ლატვიის საგარეო საქმეთა სამინისტრო არალეგიტიმურად მიიჩნევს საქართველოს აფხაზეთის რეგიონში 24 აგვისტოს გამართულ ეგრეთ წოდებულ „რიგგარეშე საპრეზიდენტო არჩევნებს", ვინაიდან ეს არჩევნები არ ჩატარებულა აღიარებულ საკანონმდებლო და კონსტიტუციურ ჩარჩოებში.
აღნიშნულთან დაკავშირებით, ლატვია კიდევ ერთხელ ადასტურებს მტკიცე მხარდაჭერას საქართველოს სუვერენიტეტისა და ტერიტორიული მთლიანობის მიმართ. ამასთან, ლატვიის საგარეო საქმეთა სამინისტრო მიიჩნევს, რომ ფიქციური არჩევნების ჩატარება კონფლიქტის მშვიდობიან მოგვარებას ხელს ვერ შეუწყობს.
„რიგგარეშე საპრეზიდენტო არჩევნები" მას შემდეგ გაიმართა, რაც აფხაზეთის წინამორბედი „პრეზიდენტი" 1 ივნისს ,საქართველოს სეპარატისტულ რეგიონში განვითარებული პოლიტიკური კრიზისის შედეგად გადადგა.
კონფლიქტის მშვიდობიანი გადაწყვეტის მიზნით, აუცილებელია გაგრძელდეს ჟენევის მოლაპარაკებები, კონფლიქტის ყველა მხარის მონაწილეობით. ევროკავშირის მონიტორინგის მისია მნიშვნელოვან როლს ასრულებს საქართველოში უსაფრთხოებისა და სტაბილურობის შენარჩუნების თვალსაზრისით.
მასალის გამოყენების პირობები
