საქართველოს საგარეო საქმეთა მინისტრი მაია ფანჯიკიძე სამუშაო ვიზიტით ეწვია ავსტრიის რესპუბლიკას, სადაც მონაწილეობა მიიღო ალპბახის ყოველწლიურ პოლიტიკურ ფორუმში. ღონისძიების მონაწილეთა შორის იყვნენ: ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში ქეთრინ ეშტონი, ავსტრიის ფედერალური პრეზიდენტი ჰაინც ფიშერი, ავსტრიის ევროპის, ინტეგრაციისა და საგარეო საქმეთა მინისტრი სებასტიან კურცი, ეუთო-ს გენერალური მდივანი ლამბერტო ზანიერი და ა.შ.
24 აგვისტოს საქართველოს საგარეო საქმეთა მინისტრი მოხსენებით წარდგა საერთაშორისო ფორუმის პლენარულ სესიაზე, რომლის თემასაც წარმოადგენდა „ევროკავშირი და მისი მეზობლები: შესაძლებლობები და გამოწვევები აღმოსავლეთ პარტნიორობისათვის". თავის გამოსვლაში მაია ფანჯიკიძემ ყურადღება გაამახვილა ზოგადად „აღმოსავლეთ პარტნიორობის" რეგიონისა და კონკრეტულად საქართველოს წინაშე არსებულ გამოწვევებსა და მათი დაძლევის შესაძლო გზებზე. შემდგომ მინისტრმა მონაწილეობა მიიღო დისკუსიაში და უპასუხა აუდიტორიის შეკითხვებს.
ალპბახში ვიზიტის ფარგლებში საქართველოს საგარეო საქმეთა მინისტრმა ასევე მონაწილეობა მიიღო ავსტრიის ევროპის, ინტეგრაციისა და საგარეო საქმეთა მინისტრის, სებასტიან კურცის სახელით გამართულ ვახშამში და დაესწრო ლიხტენშტაინის სამთავროს პრემიერ-მინისტრის ანდრიან ჰასლერის მიერ ორგანიზებულ სადილს.
მასალის გამოყენების პირობები
