ქართული მხარე მზად არის განაგრძოს ჟენევის მოლაპარაკებებში კონსტრუქციულად მონაწილეობა, - ნათქვამია საქართველოს საგარეო საქმეტა სამინისტროს განცხადებაში, რომელიც 2008 წლის აგვისტოს ომის მე-6 წლისთავთან დაკავშირებით გაავრცელა. განცხადებაში აღნიშნულია, რომ ქართული მხარისთვის ყოვლად მიუღებელია ჟენევის საერთაშორისო მოლაპარაკებების გამოყენება პოლიტიკური მიზნების მისაღწევად, არსებული ფორმატისა და დღის წესრიგის შეცვლის მეშვეობით.
"ქართული მხარე აფასებს მოლაპარაკებების თანა-თავმჯდომარეების მტკიცე პოზიციას კონსენსუსით შეთანხმებული ფორმატისა და დღის წესრიგის დარღვევის დაუშვებლობის თაობაზე. თავის მხრივ, ქართული მხარე მზად არის განაგრძოს ჟენევის მოლაპარაკებებში კონსტრუქციულად მონაწილეობა, რუსეთსა და საქართველოს შორის მდგარი პოლიტიკური საკითხების მოგვარების, უპირველეს ყოვლისა ცეცხლის შეწყვეტის შეთანხმების პირნათლად შესრულების მიზნით", - ნათქვამია განცხადებაში.