„ვისაუბრებთ ჩვენ უახლოეს გეგმებზე და გამოწვევებზე, რომელიც არის დაკავშირებული ევროკავშირსა და ნატოში ინტეგრაციის პროცესებთან, ჩვენ გვაქვს ძალიან სერიოზული ამოცანები, გვინდა, რომ ელჩებთან ერთად გავიაროთ ყველა ის გზავნილი, რომელიც უახლოესი პერიოდის განმავლობაში, მოკლევადიან და გრძელვადიან პერსპექტივაში იქნება მათთვის სახელმძღვანელო ადგილობრივ ხელისუფლებებთან დედაქალაქებში ხელისუფლებებთან სამუშაოდ. ახლოვდება ნატო-ს სამიტი, ჩვენ გვაქვს ძალიან სერიოზული სამუშაო ჯერ კიდევ დარჩენილი, რომ მივიყვანოთ ბოლომდე ჩვენ სასურველ შედეგამდე ნატო-ს გადაწყვეტილებები."-განაცხადა ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა ალექსი პეტრიაშვილმა ამბასადორიალზე სიტყვით გამოსვლამდე ჟურნალისტებთან საუბრისას.
ალექსი პეტრიაშვილმა მონაწილეობა მიიღო ამბასადორიალის ფარგლებში 2014 წლის 6 აგვისტოს გამართულ პანელზე „საქართველოს ევროპული და ევროატლანტიკური ინტეგრაციის საკითხები". სახელმწიფო მინისტრმა საზღვარგარეთ საქართველოს დიპლომატიური წარმომადგენლობების ხელმძღვანელების ყოველწლიური შეხვედრის მონაწილეების წინაშე აპარატის მიერ ევროკავშირსა და ნატო-ში ინტეგრაციის მიმართულებით გაწეული სამუშაოსა და სამომავლო გეგმების შესახებ ისაუბრა. ალექსი პეტრიაშვილმა განსაკუთრებით აღნიშნა ევროკავშირთან ასოცირებისა და მისივე შემადგენელი თავისუფალი სავაჭრო სივრცის შესახებ შეთანხმებების ხელმოწერისა და რატიფიკაციის, აგრეთვე, ასოცირების დღის წესრიგით გათვალისწინებული რეფორმების წარმატებით განხორციელების მნიშვნელობა.
ამბასადორიასლის პანელის მუშაობაში „საქართველოს ევროპული და ევროატლანტიკური ინტეგრაციის საკითხები" , ასევე, მონაწილეობდნენ საქართველოს თავდაცვის მინისტრი ირაკლი ალასანია, საქართველოს პარლამენტის ევროპასთან ინტეგრაციის კომიტეტის თავმჯდომარე ვიქტორ დოლიძე და საქართველოს პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი.
