„2017 წლიდან საქართველო სრულ პროფესიულ სამხედრო ძალებზე გადავა. ამასთან ერთად, ჩვენ ვცვლით საბჭოთა ეპოქის მიდგომას, რომელიც გულისხმობს თანამდებობრივი ანაზღაურებიდან თანამედროვე წოდებრივ ანაზღაურებაზე გადასვლას",- განაცხადა საქართველოს პრემიერ-მინისტრმა თავდაცვისა და უსაფრთხოების კონფერენციაზე, რომელიც დღეს ბათუმში გაიმართა.
სიტყვით გამოსვლისას ირაკლი ღარიბაშვილმა კონფერენციის მონაწილეებს ის დიდი სიხარული გაუზიარა, რომელიც საქართველოს მორიგ გამარჯვებას უკავშირდება.
"საქართველოსა და ევროკავშირის ურთიერთობაში დაიწყო სრულიად ახალი ეტაპი. ამ დღიდან საქართველო საერთოეროვნული თანხმობისა და საერთო ღირებულებების საფუძველზე საკუთარი მტკიცე და ურყევი ნებით ასოცირდება დიდ პოლიტიკურ და ეკონომიკურ კავშირთან. ამ შეთანხმებაზე ხელმოწერა, პირველ რიგში, ნიშნავს იმას, რომ შეუქცევადი ხდება ჩვენი ქვეყნის დემოკრატიული განვითარება, შეუქცევადი ხდება საქართველოს ევროინტეგრაციის პროცესი,"-აღნიშნა პრემიერმა.
საქართველოს მთავრობის მეთაურმა თავდაცვისა და უსაფრთხოების საკითხებზე გაამახვილა ყურადღება. მისი თქმით, ძალიან მნიშვნელოვანია, რომ მოხდეს ამ სფეროში არსებული ტენდენციების გაანალიზება, როგორც რეგიონალურ, ისე საერთაშორისო ჭრილში და საერთო ძალისხმევით ვიმსჯელოთ არსებული გამოწვევების დაძლევის გზებზე.
"უსაფრთხოების ცვალებად გარემოში საქართველოსთვის დიდი მნიშვნელობა აქვს დასავლეთის მკაფიო პოლიტიკას. ჩვენთვის მეტად მნიშვნელოვანია, რომ დასავლეთი აქტიურად იყოს ჩართული რეგიონში მიმდინარე პროცესებში. საქართველოს მთავრობის მთავარი მიზანია თანამედროვე და თავდაცვისუნარიანი ძალების განვითარება დემოკრატიული კონტროლის ქვეშ და ამაში ჩვენ ძალიან დიდ ძალისხმევას ვდებთ,"-განაცხადა ირაკლი ღარიბაშვილმა.
მან თავდაცვის სფეროში გატარებულ რეფორმებზე ისაუბრა და ხაზი გაუსვა საქართველოს მიერ მიღწეულ პროგრესს შეიარაღებულ ძალებზე სამოქალაქო კონტროლის გაზრდის, გამჭვირვალობის, ანგარიშვალდებულებისა და კეთილსინდისიერების ამაღლების კუთხით.
გამოსვლის დასასრულს, პრემიერ-მინისტრმა სიამაყით აღნიშნა, რომ საქართველოს შეიარაღებული ძალები ამჟამად ნატოსთან თავსებადობის უმაღლეს საფეხურზე იმყოფება.
"მინდა განვაცხადო, რომ საქართველომ დაამტკიცა, რომ ის ერთგულად ემსახურება საერთაშორისო სტაბილურობისა და უსაფრთხოების განმტკიცების საქმეს და ნამდვილად შესწევს უნარი საკუთარი წვლილი შეიტანოს საერთო ევროატლანტიკური უსაფრთხოების განმტკიცების საქმეში,"-განაცხადა ირაკლი ღარიბაშვილმა.