საქართველოსა და ევროკავშირს შორის ასოცირების შეთანხმებაზე ხელმოწერის აღნიშვნა ქ. ბრატისლავაში
2014 წლის 27 ივნისს სლოვაკეთში საქართველოს საელჩომ, მოლდოვისა და უკრაინის საელჩოსთან ერთად სლოვაკეთში ევროკომისიის წარმომადგენლობის ორგანიზებით ევროკავშირთან ასოცირების შეთანხმებაზე ხელმოწერასთან დაკავშირებით ევროკომისიის წარმომადგენლობის ოფისში საზეიმო ღონისძიება გამართეს.
აღნიშნულ ღონისძიებაში მონაწილეობა მიიღეს სლოვაკეთის რესპუბლიკაში საქართველოს ელჩმა, მოლდოვის ელჩმა ა.პოპოვმა (რეზიდენციით ქ.ვენაში), უკრაინის საელჩოს მრჩეველმა ვ.უსატიმ და სლოვაკეთში ევროკომისიის ოფისის ხელმძღვანელმა დ.ხრენეკმა.
ღონისძიებას ესწრებოდნენ სლოვაკეთში აკრედიტირებული დიპლომატიური მისიების ხელმძღვანელები, მაღალი დონის დიპლომატები და სლოვაკეთის საგარეო უწყების თანამდებობის პირები.
ღონისძიების ფარგლებში მისასალმებელი სიტყვით გამოვიდა ბ-ნი დ.ხრენეკი, ასევე, საქართველოსა და მოლდოვის ელჩები და უკრაინის საელჩოს წარმომადგენელი. ასევე, მისალოცი სიტყვით გამოვიდა სლოვაკეთის რესპუბლიკის საგარეო და ევროპულ საქმეთა სამინისტროს პოლიტიკური დირექტორი ლ.რეჰაკი. მან ხაზი გაუსვა, რომ სლოვაკეთი გააგრძელებს სამივე ქვეყნის მხარდაჭერას მათ ევროპულ არჩევანში და რომ სლოვაკეთის მხარე მზადყოფნას გამოთქვამს გაუზიაროს მისი ქვეყნის გამოცდილება ევროკავშირისკენ მიმავალ გზაზე.
ღონისძიების დასასრულს გაიმართა საზეიმო მიღება.
