,,ნაცმოძრაობა" რუსეთის საგარეო საქმეთა მინისტრის სერგეი ლავროს განცხადებას ეხმიანება. როგორც პარტიის ოფისში გამართულ პრესკონფერენციაზე ,,ნაცმოძრაობის" დეპუტატმა ზურაბ ჭიაბერაშვილმა განაცხადა ლავროვის მუქარამ კიდევ ერთხელ დაადასტურა საქართველოს ხელისუფლების მიერ არჩეული საგარეო-პოლიტიკური კურსის სიმცდარეა.
,,რუსეთის საგარეო საქმეთა მინისტრის, სერგეი ლავროვის დღევანდელმა მუქარამ კიდევ ერთხელ დაადასტურა საქართველოს ხელისუფლების მიერ არჩეული საგარეო-პოლიტიკური კურსის სიმცდარე. საქართველოს ხელისუფლების მხრიდან ოკუპანტ სახელმწიფოსთან ენის მოჩლექით საუბარმა შედეგად ვერ მოიტანა რუსეთთან ურთიერთობის "ნორმალიზება" (როგორც ამას კოალიცია "ქართული ოცნება" პირდებოდა საზოგადოებას), მაგრამ, სამწუხაროდ, საქართველოს მეგობრებში შეასუსტა იმის განცდა, რომ საქართველოს რუსეთის მხრიდან სერიოზული პრობლემები ელოდება ევროკავშირთან ასოცირების ხელშეკრულების ხელმოწერის შემდეგ.საქართველოს ეროვნული ინტერესებისათვის საზიანო იყო პრემიერი ღარიბაშვილის მიერ საერთშორისო ასპარეზზე გაკეთებული განცხადებები, თითქოს საქართველოს რუსეთთან ურთიერთობაში რაიმე წარმატება აქვს და მეგობრების დახმარება არ სჭირდება. ამ დროს, კრემლი კვლავ ღია და აშკარა ფორმით გვემუქრება", _განაცხადა ჭიაბერაშვილმა და აღნიშნა, რომ კრემლის მუქარა ასევე შეიცავს სხვა ძალიან სახიფათო ასპექტებსაც.
,,იმვადროულად, კრემლის მუქარა ასევე შეიცავს სხვა ძალიან სახიფათო ასპექტებს: ესაა გალის რაიონიდან ეთნიკური ქართველების გამოყრა ანდა, ყირიმის მსგავსად, ოკუპირებული ცხინვალის რეგიონის რუსეთის ფედერაციასთან პირდაპირ მიერთება.საქართველოს ხელისუფლებამ თავი უნდა დაანებოს რუსეთთან ურთიერთობის "ნორმალიზებაზე" საუბარს და, ევროპელ პარტნიორებთან ერთად, რუსეთის აგრესიულ პოლიტიკაზე ისეთი საპასუხო ნაბიჯები დაგეგმოს, რაც საქართველოს მოქალაქეებს მოსალოდნელ ზიანს და საფრთხეს ააცილებს თავიდან", _განაცხადა ჭიაბერაშვილმა.
