კოალიცია ,,ქართული ოცნების" წევრი ზურაბ აბაშიძე მთავრობის მიერ საჯარო სამსახურში პრემიის ოდენობის განსაზღვრის წესის მიღებას ეხმიანება და აცხადებს, რომ გადაწყვეტილება ცოტა ადრეც უნდა ყოფილიყო მიღებული.
,,პრემიებთან დაკავშირებით გადაწყვეტილება მიაჩნია რომ ცოტა ადრეც უნდა ყოფილიყო მიღებული. მაშინ როდესაც არჩევნების შემდეგ პარლამენტმა მალევე მიიღო ეს გადაწყვეტილება დავით უსუფაშვილის ხელმძღვანელობით", - განაცხადა აბაშიძემ ,,პრაიმ ტაიმის" პრესკლუბში.
შეგახსენებთ, რომ მთავრობამ საჯარო სამსახურში პრემიის ოდენობის განსაზღვრის წესი ტექნიკური შენიშვნებით მიიღო და საბოლოო სახეს 1-ელ ივლისს მიიღებს.როგორც მთავრობის დღევანდელი სხდომის შემდეგ ჟურნალისტებთან საუბრისას მთავრობის ადმინისტრაციის უფროსის მოადგილემ ნინო კობახიძემ განმარტა, დადგენილება, რომელიც პრემიების გაცემის წესს, მაქსიმალურ ზღვარს და პრემიების გამცემ პირთა წრეს განსაზღვრავს, მთავრობამ ტექნიკური შენიშვნებით მიიღო და საბოლოო სახეს 1-ელ ივლისს მიიღებს.
„1-ელ ივლისს წარმოდგენილი იქნება ერთიანი კონცეფცია. ამ დოკუმენტით განისაზღვრება და პასუხი გაეცემა, თუ როგორ უნდა მოხდეს საჯარო სამსახურში მიღება, დაწინაურება, რანგირება, გათავისუფლება. დადგენილება პრემიების შესახებ უკვე მიღებულია და მასში ცვლილებები აღარ იქნება. დადგენილების თანახმად, კვარტალში ერთხელ, ხელფასის 100%-იანი ოდენობის გაცემის უფლება აქვს უწყების ხელმძღვანელს, ხოლო იმ უწყებებში, რომლებიც პრემიერ-მინისტრის დაქვემდებარებაში შემოდიან, პრემიის გაცემა უნდა მოხდეს პრემიერთან შეთანხმებით", - განაცხადა ნინო კობახიძემ და განმარტა, რომ აღნიშნულ პროცესზე კონტროლი სახელმწიფო ხაზინას დაევალება.
