მთავრობამ საჯარო დაწესებულებებში პრემიის ოდენობის განსაზღვრის წესი დაამტკიცა. როგორც ჟურნალისტებთან საჯარო სამსახურის ბიუროს ხელმძღვანელმა ეკა ქარდავამ განაცხადა პრემიების გაცემის ახალი წესი შეეხება საჯარო სამსახურში დასაქმებულ პირებს, მათ შორის უმაღლესი თანამდებობის პირებს.
მისივე განმარტებით, პრემიის გაცემის ინიცირების უფლება აქვს ხელმძღვანელს, გადაწყვეტილებას კი, დაწესებულების ხელმძღვანელი, ანუ, ამ შემთხვევაში პრემიერ-მინისტრი იღებს.
„საკითხი კანონში არაერთგვაროვნად იყო მოწესრიგებული, ამიტომ, პრემიერ-მინისტრმა საჭიროდ ჩათვალა დადგენილებით დაკონკრეტებულიყო. ის მთავრობამ მიიღო და შინაარსი საზოგადოებას ძალიან მალე ეცნობება. ერთჯერადად გაცემული პრემიის ზღვრული ოდენობა თანამდებობრივ სარგოს არ უნდა აღემატებოდეს. პრემიის გაცემის ინიცირების უფლება აქვს ხელმძღვანელს, გადაწყვეტილებას კი, დაწესებულების ხელმძღვანელი, ანუ, ამ შემთხვევაში პრემიერ-მინისტრი იღებს. რაც შეეხება საკუთარ თავზე პრემიის გამოწერას, ეს შესაძლებლობა იკრძალება", - განაცხადა ქარდავამ.
