უკრაინის პრეზიდენტმა პეტრო პოროშენკომ სამხედროებისათვის ბრძანება გასცა ყოველგვარი ყოყმანის გარეშე გახსნან ცეცხლი სეპარატისტების თავდასხმის საპასუხოდ. განცხადება ამის შესახებ პრეზიდენტის პრესსამსახურმა გაავრცელა.
„სახელმწიფოს მეთაური არ გამორიცხავს, რომ დაზავების რეჟიმი ვადაზე ადრე შეწყდეს. ამის მიზეზი კი არის გარედან კონტროლირებადი ბოევიკების მიერ ცეცხლის გამუდმებული გახსნა",_ნათქვამია განცხადებაში.
მათივე ინფორმაციით, ცეცხლის შეწყვეტის გამოცხადებიდან ბოევიკებმა უკრაინელი სამხერდორბის პოზიციებს უკვე 35 ჯერ გაუხსნეს ცეცხლი. 24 ივნიის ვერტმფრენი ჩამოაგდეს, რომელშიც 9 ადამიანი იყო. ყველა მათგანი დაიღუპა.
გავრცელებული ინფორმაციით, პოროშენკოს იმედი აქვს, რომ დღეს, 25 ივნისს სატელეფონო კონფერენციას ჩაატარებს გერმანიის კანცლერის ანგელა მერკელი, საფრანგეთის პრეზიდენტის ფრანსუა ოლანდისა და რუსეთის პრეზიდენტის ვლადიმერ პუტინის მონაწილეობით.
„პოროშენკო იმედოვნებს, რომ ამ საუბრის შემდეგ რუსეთი განაიარაღებს და უკან გაიწვევს თავის ბოევიკებს უკრაინის ტერიტორიიდან",_ ნათქვამია პრეზიდენტის პრესსამსახურის განცხადებაში.
ამავდრულად დონეცკის თვითგამოცხადებული რესპუბლიკის ლიდერი ალექსანდრე ბოროდაი აცხადებს, რომ მისი აზრით, უკრაინის პრეზიდენტის მიერ გამოცხადებული დაზავების დაცვას არავითარი აზრი არ აქვს.
„ოფიციალურად ვაცხადებ, რომ არავითარი შეთანხმება ცეცხლის შეწყვეტის შესახებ არ ყოფილა და არც იქნება. ოფიციალური კიევი ჩვენს მოტყუებას ცდილობდა და ჩვენთან გამოაგზავნა საკონტაქტო ჯგუფი, რომელსაც როგორც გაირკვა არავითარი უფლებამოსილება არ ჰქონდათ. ასე რომ არავითარი ცეცლის შეწყვეტის შეთანხმება არ ყოფილა. ერთადერთი რაც გვრჩებოდა ბრძოლის გაგრძელება იყო",_ განაცხადა ბოროდაიმ.