საქართველოს საპარლამენტო დელეგაცია, საგარეო ურთიერთობათა კომიტეტის თავმჯდომარის, თედო ჯაფარიძის ხელმძღვანელობით, სამუშაო ვიზიტით ჩეხეთის რესპუბლიკაში იმყოფება. როგორც ,,ჯი-ეიჩ-ენს" საკანონმდებლო ორგანოდან აცნობეს ვიზიტი საგარეო საქმეთა სამინისტროს პოლიტიკურ დირექტორ, ვაცლავ ბალეკთან შეხვედრით დაიწყო. შეხვედრაზე, სხვა აქტუალურ საკითხებთან ერთად, საქართველოს ევროპულ და ევროატლანტიკურ ინტეგრაციასთან დაკავშირებული თემები განიხილეს; კერძოდ, საქართველო-ევროკავშირს შორის ასოცირების შესახებ შეთანხმების, ღრმა და ყოვლისმომცველი თავისუფალი სავაჭრო სივრცის კომპონენტის (DCFTA) ჩათვლით, ხელმოწერა და მისი შემდგომი იმპლემენტაცია; საქართველო-ნატოს თანამშრომლობის შემდგომი განვითარების პერსპექტივები და ნატო-ს მომავალ სამიტზე საქართველოს მიერ გაწევრიანების გზაზე მიღწეული პროგრესის ასახვის შესაძლებლობები. ასევე, საუბარი შეეხო საქართველოს ოკუპირებულ ტერიტორიებზე არსებულ მდგომარეობას, რუსეთთან ურთიერთობებს და უკრაინაში განვითარებულ მოვლენებს.
ჩეხეთის მხარემ კიდევ ერთხელ დააფიქსირა საქართველოს მხარდაჭერა ქვეყნის ევროპულ და ევროატლანტიკურ სტრუქტურებში ინტეგრაციის გზაზე.
ვიზიტის ფარგლებში, ქართული დელეგაციის პატივსაცემად, ჩეხეთის რესპუბლიკის პარლამენტის საგარეო საქმეთა კომიტეტის თავმჯდომარემ, კარელ შვარცენბერგმა სამუშაო სადილი გამართა, რომელსაც ჩეხეთის პარლამენტის საგარეო საქმეთა კომიტეტის წევრები დაესწრნენ. კარელ შვარცენბერგმა კიდევ ერთხელ აღუთქვა ქართველ კოლეგას მტკიცე მხარდაჭერა, როგორც საგარეო-პოლიტიკური ამოცანების განხორციელების, ასევე, გამოცდილების გაზიარების თვალსაზრისით. ჩეხმა დეპუტატმა ქართველ კოლეგას, საერთაშორისო კონფერენციის გამართვა შესთავაზა, რომლის სავარაუდო თარიღად მიმდინარე წლის შემოდგომა დასახელდა და რომელზეც ჩეხი პარლამენტარები ქართველ კოლეგებს ევროკავშირთან ფართო მასშტაბიანი დაახლოების თვალსაზრისით თავის გამოცდილებას გაუზიარებენ, რასაც გულისხმობს სწორედ ასოცირების შესახებ შეთანხმების ხელმოწერა.
სამუშაო ვიზიტის პირველივე დღეს თედო ჯაფარიძემ შეხვედრა გამართა ნატოს საკითხებში ჩეხეთის რესპუბლიკის სახელმწიფო მდივანთან, დანიელ კოშტოვალთან. საუბრის ძირითად თემას კარდიფის ნატოს სამიტის მოახლოებასთან დაკავშირებით ორი ქვეყნის შეთანხმებულად მოქმედება წარმოადგენდა. გარდა ამისა, მხარეებმა ორმხრივი სამხედრო თანამშრომლობის საკითხებზეც ისაუბრეს. დანიელ კოშტოვალმა კიდევ ერთხელ ხაზგასმით აღნიშნა საქართველოს უზარმაზარი როლი საერთაშორისო უსაფრთხოების განმტკიცებაში და ის ფაქტი, რომ სამხედრო რეფორმის თვალსაზრისით საქართველო ნატოში გაწევრიანებისთვის მზად არის.
საქართველოს საპარლამენტო დელეგაციას თედო ჯაფარიძესთან ერთად, ზვიად კვაჭანტირაძე და გიორგი წერეთელი წარმოადგენენ.
