სამოქმედო გეგმის შემუშავების პროცესში, საზოგადოებრივმა ორგანიზაციებმა შეიმუშავეს რეკომენდაციათა პაკეტი - დასაბუთება და ჩამონათვალი იმ ვალდებულებებისა, რომელთა განხორციელების შემთხვევაში, სახელმწიფო ორგანოები უფრო გამჭვირვალე და ანგარიშვალდებული გახდებიან. რეკომენდაციებს შორისაა სასამართლოს მიერ ფარული მიყურადების შესახებ სტატისტიკური ინფორმაციის პროაქტიული გამოქვეყნება გარკვეული პერიოდულობით. სასამართლოს მიერ ხსენებული სტატისტიკის გამოქვეყნების შემთხვევაში, საზოგადოებას საშუალება ექნება, მიიღოს ინფორმაცია ფარული მიყურადების რა რაოდენობის მოთხოვნებით მიმართავენ შესაბამისი ორგანოები სასამართლოს და რა რაოდენობის მოთხოვნებს აკმაყოფილებს სასამართლო. უზენაესი სასამართლოს წარმომადგენელს, რომელიც ჩვენ მიერ შემუშავებული რეკომენდაციების განხილვებს ესწრებოდა, ჯერ-ჯერობით არ გამოუხატავს სასამართლოს ოფიციალური პოზიცია ამ ვალდებულების აღებაზე.

საკითხზე გადაწყვეტილების მიღებისას, ვფიქრობთ, უნდა გაითვალისწინოთ, რომ ფარული მიყურადების მიმართ არსებობს მომეტებული საზოგადოებრივი ინტერესი. მნიშვნელოვანია, რომ ფარული მიყურადების შესახებ საჯარო ინფორმაციის ხელმისაწვდომობის პრობლემურობა დადასტურებულია შესაბამისი კვლევებით. ფარული მიყურადების პრაქტიკასთან დაკავშირებული საკითხების დაუყოვნებლივ გადაჭრის აუცილებლობაზე საკუთარ ანგარიშში გაამახვილა ყურადღება თომას ჰამარბერგმაც - საქართველოში ევროკავშირის სპეციალურმა მრჩეველმა სამართლებრივი და საკონსტიტუციო რეფორმისა და ადამიანის უფლებების საკითხებში.

მნიშვნელოვანია აგრეთვე აღინიშნოს ის ფაქტი, რომ 2013 წლის 17 დეკემბერს, მსოფლიო მასშტაბით 100-ზე მეტმა არასამთავრობო ორგანიზაციამ (მათ შორის საქართველოდან), საჯარო მიმართვა გაავრცელა ,,ღია მმართველობის პარტნიორობის" (OGP) თანათავმჯდომარეების, მუდმივმოქმედ კომიტეტისა და OGP-ის წევრი ქვეყნების სახელზე. საჯარო მიმართვა მსოფლიო მასშტაბით მიყურადების არაპროპორციულ პრაქტიკას და გამჭვირვალობის ეფექტურ უზრუნველყოფის მოთხოვნას უკავშირდებოდა. მიმართვის ერთ-ერთი ძირითადი რეკომენდაცია კი OGP-ის წევრ ქვეყნებში ფარულ მიყურადებაზე საზოგადოებრივი ზედამხედველობის მექანიზმების გაუმჯობესება იყო. სწორედ ამ კონტექსტში მნიშვნელოვნად მიგვაჩნია საქართველოს სასამართლო ხელისუფლებამ უზრუნველყოს ასეთი სტატისტიკური მონაცემების საჯაროობა.

მიგვაჩნია, რომ შესაბამისი ნების არსებობის შემთხვევაში სასამართლოს შეუძლია, ფარული მიყურადების შესახებ სტატისტიკური ინფორმაცია მარტივად დაამუშავოს და პროაქტიულად გამოაქვეყნოს გარკვეული პერიოდულობით, საუკეთესო შემთხვევაში, ყოველ სამ თვეში. მნიშვნელოვანია, რომ ასეთი სტატისტიკური მონაცემების გამოქვეყნება არ იძლევა ინფორმაციას ოპერატიულ- სამძებრო ღონისძიების შინაარსის შესახებ და მისი გასაჯაროებით ვერმ ოხდება ოპერატიულ-სამძებრო ღონისძიების თაობაზე საიდუმლო მონაცემების იდენტიფიცირება. ამავე დროს, ამ ტიპის მონაცემების საჯაროობა ხელს შეუწყობს საზოგადოებრივი ზედამხედველობის მექანიზმების გაუმჯობესებას, გამჭვირვალობისა და ღია მმართველობის მაღალი სტანდარტების დამკვიდრებას ჩვენს ქვეყანაში.

გამოვთქვამთ სრულ მზადყოფნას, ვითანამშრომლოთ თქვენთან და სხვა შესაბამის უწყებებთან საკითხის დროულად და ეფექტურად გადასაწყვეტის მიზნით", _ნათქვამია მიამრთვაში.

ფორუმის წევრი არასამთვრობო ორგანიზაციები:ინფორმაციის თავისუფლების განვითარების ინსტიტუტი (IDFI), ,,საერთაშორისო გამჭვირვალობა - საქართველო", ,,საქართველოს ახალგაზრდა იურისტთა ასოციაცია", ,,ფონდი ღია საზოგადოება - საქართველო", ,,ჯამპსტარტჯორჯია", ეკონომიკური პოლიტიკისა კვლევის ცენტრი, ,,ფონდი პარტნიორობა საგზაო უსაფრთხოებისათვის",