ცესკო არჩევნებში მონაწილე რამდენიმე კანდიდატისთვის ხმების დაკლებას მექანიკური შეცდომით ხსნის. როგორც ჟურნალისტებთან ცენტრალური საარჩევნო კომისიის თავმჯდომარემ თამარ ჟვანიამ განაცხადა ცესკო-ს ოპერატორები უკვე ამოწმებენ რამდენად სწორადაა შეყვანილი თითოეული ოქმის შედეგები.
,,მიხარია, რომ ასეთი კარგი დამკვირვებლები გვყავს და ასე კარგად აკვირდებიან თითოეულ ნიუანსს. ამ კონკრეტულ შემთხვევაში მექანიკური შეცდომა მოხდა. ოპერატორს შეეშალა ერთიანის შეყვანა ორ შემთხვევაში, ერთ შემთხვევაში კი არ იყო შეყვანილი შესწორებული ოქმი. არა მარტო მელიას შემთხვევაში, ალბათ, სხვა კანდიდატების შემთხვევაშიც შესაძლებელია არსებობდეს ასეთი მექანიკური შეცდომა. ცენტრალური საარჩევნო კომისიის ოპერატორები ამოწმებენ კონკრეტული ოქმი რამდენად სწორადაა შეყვანილი", _განაცხადა თამარ ჟვანიამ.
შეგახსენებთ, რომ არასამთავრობო ორგანიზაცია "საერთაშორისო გამჭვირვალობა საქართველო" არჩევნებში მონაწილე რამდენიმე კანდიდატისთვის ცესკო-ს მხრიდან ხმების დაკლებაზე მიუთითებს.
კერძოდ, საუბარია "ნაციონალური მოძრაობის" მერობის კანდიდატ ნიკა მელიაზე, რომელსაც "საერთაშორისო გამჭვირვალობის" ინფორმაციით, საბურთალოს #78-ე უბანზე ოქმში 131-ის ნაცვლად, 31 ხმა უწერია, ასევე სამგორში, #20-ე უბანზე 118 ხმის მაგივრად 18 უწერია და სამგორის #12-ე უბანზე, სადაც მელიას ოქმში 111-ის ნაცვლად, 11 ხმა უწერია.
"საერთაშორისო გამჭვირვალობის" წარმომადგენლები ასევე საუბრობენ "პატრიოტთა ალიანსის" კანდიდატ ირმა ინაშვილისთვის ხმების დაკლებაზე.
