ჩვენ ვიცით საქართველოს მოსახლეობის ევროპული მისწრაფებების შესახებ და მათ ვპასუხობთ დადებითად, რისი გამოხატულებაც არის 27 ივნისს ასოცირების ხელშეკრულებაზე ხელმოწერა, - განაცხადა ევროკომისიის პრეზიდენტმა ჟოზე მანუელ ბაროზომ საქართველოს პრემიერ-მინისტრთან ერთად გამართულ პრესკონფერენციაზე.
მან მადლობა გადაუხადა საქართველოს მთავრობის მეთაურს თბილი და გახსნილი დახვედრისთვის და ხაზი გაუსვა ასოცირების ხელშეკრულების ხელმოწერის მნიშვნელობას.
„ეს არის უდიდესი სტიმული საქართველოს ეკონომიკისთვის, მნიშვნელოვანია სტაბილურობის მინიჭებისთვის საქართველოსთვის. ხელშეკრულება ეხება საერთო ღირებულებებს. იგი ეხება არამარტო საქართველოს ბიზნესს, არამედ ქართველ მომხმარებლებს და ხელს შეუწყობს საქართველოს ეკონომიკის ზრდას და ურთიერთობების სტაბილურობას", - განაცხადა ბაროზომ.
თავის მხრივ საქართველოს პრემიერ-მინისტრმა ირაკლი ღარიბაშვილმა ევროკომისიის პრეზიდენტთან შეხვედრის დეტალებზე ისაუბრა. მისი განცხადებით, განხილვის მთავარი თემა იყო ის კონკრეტული ამოცანები, რომელიც შეთანხმების ხელმოწერის შემდეგ საქართველოს წინაშე დადგება.
„ასოცირების შეთანხმება საქართველოს ევროკავშირთან უპრეცედენტოდ დააახლოებს, ევროპული პოლიტიკური, ეკონომიკური, სოციალური და სამართლებრივი სტანდარტების დანერგვის გზით, რაც ფაქტობრივად, შეუქცევადს გახდის საქართველოს ევროინტეგრაციის პროცესს. საქართველოს მთავრობა მზადაა, ეფექტიანად გამოიყენოს ეს შესაძლებლობა, რათა ჩვენმა თითოეულმა მოქალაქემ მალე მიიღოს შეთანხმებით გათვალისწინებული სარგებელი", - განაცხადა ირაკლი ღარიბაშვილმა.
პრემიერის განმარტებით, მთავრობა აცნობიერებს, რომ ასოცირების პროცესი შრომატევადია და ფართომასშტაბიან რეფორმებს ითვალისწინებს , თუმცა ამ მიმართულებით ძალისხმევის გასაძლიერებლად მზად არის.
მისივე ინფორმაციით, ევროკომისიის პრეზიდენტთან შეხვედრაზე საუბარი სავიზო რეჟიმის ლიბერალიზაციის სამოქმედო გეგმის პირველი ფაზის განხორციელების კუთხით მიღწეულ პროგრესსაც შეეხო. პრემიერმა იმედი გამოთქვა, რომ ევროკომისია მეორე ფაზაზე გადასვლის გადაწყვეტილებას უახლოეს მომავალში გამოაცხადებს.
„საქართველოს მთავრობა მზადაა, გააგრძელოს აქტიური ძალისხმევა ევროინტეგრაციის დღის წესრიგის წარმატებით განხორციელებისთვის, რათა ევროკავშირთან ერთად ვაშენოთ საერთო მომავალი. მოხარული ვარ ევროკავშირთან იმ თანხმობით, რომ ასოცირების შეთანხმების ხელმოწერა არ არის ჩვენი თანამშრომლობის საბოლოო მიზანი, არამედ ეს მხოლოდ დასაწყისია იმ გზისა, რომელიც საქართველოს ევროპულ ოჯახში დააბრუნებს", - განაცხადა ირაკლი ღარიბაშვილმა.