საქართველოს პრემიერ-მინისტრი ირაკლი ღარიბაშვილი ევროკომისიის პრეზიდენტს ჟოზე მანუელ ბაროზოს შეხვდა.
პირისპირ შეხვედრაზე მხარეებმა საქართველო-ევროკავშირს შორის ასოცირების ხელშეკრულების ხელმოწერის შემდგომი რეფორმების პროცესსა და ევროკავშირთან უვიზო რეჟიმის შემოღების პერსპექტივებზე იმსჯელეს.
ხაზგასმით აღინიშნა, რომ ასოცირების შეთანხმება საქართველო-ევროკავშირის ურთიერთობებს ახალ ეტაპზე გადაიყვანს და საქართველოს ევროინტეგრაციის პროცესს შეუქცევადს გახდის.
პრემიერ-მინისტრმა ევროკომისიის პრეზიდენტს ევროინტეგრაციის დღის წესრიგით გათვალისწინებული რეფორმების განხორციელების პროცესში დახმარებისთვის მადლობა გადაუხადა და იმედი გამოთქვა, რომ ეს მხარდაჭერა მომავალშიც გაგრძელდება.
ირაკლი ღარიბაშვილმა და ჟოზე მანუელ ბაროზომ ენერგეტიკის, ტრანსპორტის, სოფლის მეურნეობის, განათლებისა და მეცნიერების სფეროებში საქართველო-ევროკავშირის თანამშრომლობის გაღრმავების პერსპექტივებიც განიხილეს.
--
