ხვალ, 12 ივნისს საქართველოს ევროკომისიის პრეზიდენტი ჟოზე-მანუელ ბაროზუ ეწვევა. ევროკომისიის პრეზიდენტი მიმდინარე წლის 13 ივნისს საქართველოს პრემიერ მინისტრთან ირაკლი ღარიბაშვილთან ერთად გახსნის საქართველო-ევროკავშირის მაღალი დონის საერთაშორისო საინვესტიციო კონფერენციას.
აღსანიშნავია, რომ ამ მასშტაბის კონფერენცია პირველად ტარდება საქართველოში და წარმოადგენს ჩვენი ქვეყნისადმი ევროკავშირისა და საერთაშორისო პარტნიორების მკაფიო პოლიტიკური მხარდაჭერის დემონსტრირებას, რაც განსაკუთრებულ მნიშვნელობას იძენს საქართველო-ევროკავშირის ასოცირების შეთანხმების მოახლოებული ხელმოწერის ფონზე.
საქართველოს ეძლევა კარგი შესაძლებლობა, საერთაშორისო პარტნიორებს გააცნოს ასოცირების შეთანხმების, განსაკუთრებით, ღრმა და ყოვლისმომცველი ვაჭრობის სივრცის ეფექტიან იმპლემენტაციასთან დაკავშირებული რეფორმების დღის წესრიგი და პრიორიტეტები, ასევე, წარმოაჩინოს საქართველოში ბიზნესისა და ინვესტიციების მიმართულებით შექმნილი ახალი პერსპექტივები.
კონფერენციის ფარგლებში ევროპის საინვესტიციო ბანკსა და საქართველოს შორის ხელი მოეწერება ინფრასტრუქტურულ პროექტს, რომლის ბიუჯეტი 80 მილიონ ევროს შეადგენს.
ევროკომისიის პრეზიდენტი საქართველოში ვიზიტის ფარგლებში საქართველოს პრეზიდენტს და პრემიერ მინისტრს შეხვდება.
საგარეო საქმეთა სამინისტროს
