პარლამენტის თავმჯდომარე, დავით უსუფაშვილი უელსის პარლამენტის თავმჯდომარეს როზმარი ბატლერს შეხვდა. როგორც ,,ჯი-ეიჩ-ენს" პარალემნტის პრესსამსახურიდან აცნობეს ორ ქვეყანას შორის არსებული მჭიდრო ურთიერთობა და მომავალში საპარლამენტო საქმიანობის გამოცდილების გაზიარება იყო ერთ-ერთი მთავარი თემა საქართველოს დავით უსუფაშვილისა და როზმარი ბატლერის შეხვედრისა, რომელიც დღეს, თბილისში, იუსტიციის სახლში გაიმართა.
შეხვედრაზე განსაკუთრებული ყურადღება დაეთმო დაძმობილებული ქალაქების - ქუთაისისა და ნიუპორტის ურთიერთკავშირებს, რომლებმაც თითქმის 25 წლის წინათ გააფორმეს ხელშეკრულება მეგობრობის შესახებ. როგორც შეხვედრაზე აღინიშნა, ამ ორ ქალაქს შორის თანამშრომლობა კულტურის, განათლებისა და მეცნიერების სფეროში მომავალშიც აქტიურად გაგრძელდება. მხარეებმა აქცენტი გააკეთეს უელსისა და საქართველოს საპარლამენტო ცხოვრებაზე და საპარლამენტო საქმიანობის გაზიარების აუცილებლობაზეც ისაუბრეს. საქართველოს პარლამენტის თავმჯდომარემ სტუმარს გააცნო საქართველოს უმაღლესი საკანონმდებლო ორგანოს სტრუქტურა, მუშაობის პროცედურები და ისაუბრა პარლამენტის მნიშვნელობაზე ქართული დემოკრატიისათვის. თავის მხრივ, უელსის პარლამენტის თავმჯდომარემ საქართველოს პარლამენტის თავმჯდომარეს შესთავაზა, რომ გამოცდილების გაზიარების მიზნით, უელსს საქართველოს პარლამენტის წარმომადგენელები ეწვიონ.
საუბარი ასევე შეეხო მოახლოებული ადგილობრივი თვითმმართველობის არჩევნებს საქართველოში და გეოპოლიტიკურ საკითხებს. შეხვედრაზე ყურადღება დაეთმო იმ ფაქტსაც, რომ ნატო-ს მომავალი სამიტი სწორედ ქალაქ ნიუპორტში იმართება.
საქართველოს პარლამენტის თავმჯდომარემ ისაუბრა საქართველოსათვის ნატო-ს წლევანდელი სამიტის მნიშვნელობაზე და აღნიშნა, რომ „ჩვენ ველოდებით სასარგებლო და პრაქტიკულ ნაბიჯებს ამ სამიტიდან საქართველოსთან მიმართებაში". შეხვედრას ესწრებოდა დიდი ბრიტანეთისა და ჩრდილოეთ ირლანდიის გაერთიანებული სამეფოს საგანგებო და სრულუფლებიანი ელჩი საქართველოში ალექსანდრა მერი ჰოლ ჰოლი.
