პრემიერ-მინისტრის ირაკლი ღარიბაშვილის განცხადებით, სახელმწიფო მთიანი რეგიონების მოვლა-პატრონობას იწყებს. ამის შესახებ, ღარიბაშვილმა ხევსურეთში სტუმრობისას განაცხადა.
,,აქვე მინდა გითხრათ, თქვენო უწმინდესობავ, ძვირფასო მეგობრებო, რომ სახელმწიფო იწყებს მთიანი რეგიონების მოვლა-პატრონობას. როგორც ვიცით, მთებს საქართველოს ორ მესამედზე მეტი უკავია და ჩვენ არ დავიშურებთ ძალისხმევას, რომ შევინაჩუნოთ და საკუთარ მიწა-წყალზე დაბრუნების საშუალება მივცეთ მთის მკვიდრ მოსახლეობას. ჩვენ ხელს ვუწყობთ მთიან რეგიონებში შობადობის მატებას და ვზრუნავთ დემოგრაფიული მდგომარეობის გაუმჯობესებაზე. ამიტომ, ჩვენი ინიციატივით, ყოველი მესამე შვილის მშობელი სახელმწიფოსგან მიიღებს ყოველთვიურ 200-ლარიან დახმარებას", _განაცახდა ღარიბაშვილმა.
მისივე თქმით, მთავრობა მუშაობს მთის კანონზე და ამ მიზნით შექმნილია სპეციალური სამუშაო ჯგუფი.
,, ასევე ჩვენ ვმუშაობთ მთის კანონზე, შექმნილია სპეციალური სამუშაო ჯგუფი და ჩვენ წლის ბოლომდე, ოქტომბერში მივიღებთ მთის კანონს. ჩვენი მთავრობის პოლიტიკური ნებაა ყოველმხრივ დაუჭიროს მხარი ყველა იმ პროექტს, რომელიც მოემსახურება დიდ საქვეყნო საქმეს - მოსახლეობის შენარჩუნებას მაღალმთიან სოფლებში. მე დარწმუნებული ვარ, ჩვენ ამ საქმეს ერთად, თქვენი ჩართულობით აუცილებლად მივიყვანთ ბოლომდე, ვინაიდან მთა ჩვენი სიძლიერეა, ჩვენი სიამაყეა, მთა ყველაზე კარგად ინახავს ქართულ სულს, ქართულ გენს, ჩვენს ადათ-წესებს, და ჩვენი ვალია, მას მოვუაროთ, მოვუფრთხილდეთ, არ დავკარგოთ უნიკალური ტრადიციები და შევინარჩუნოთ ჩვენი თვითმყოფადობა. და თუ მთა იქნება ძლიერი, მჯერა, ჩვენი სამშობლოც იქნება ძლიერი", _განაცახდა პრემიერმა.
