აჭარის მთავრობის თავმჯდომარე არჩილ ხაბაძე აჭარის უმაღლეს საბჭოს დეპუტატის მედეა ვასაძესა და ,,ტვ25"-ის ჟურნალისტ ჯაბა ანანიძეს შორის მომხდარ ინციდენტს ეხმიანება და აცხადებს, რომ უნდა მოხდეს მომხდარი ფაქტის შესწავლა. თუმცა ხაბაძის განმარტებით, აღნიშნული მისთვის მიუღებელია.
„ვფიქრობ, რომ, პირველ რიგში, უნდა მოხდეს აღნიშნული ფაქტის შესწავლა და შეფასება. ვიცი, რომ ბატონი ჯაბა აპირებს საჩივრის შეტანას. თუ არსებობს დანაშაულის ნიშნები, ეს სამართალდამცავებმა უნდა შეაფასონ. ჩემთვის პირადად ეს ფაქტი მიუღებელია როგორც ადამიანისთვის, როგორც ამ ქვეყნის შვილისთვის და იმ მთავრობის წარმომადგენლისთვის, რომელსაც დემოკრატიული ღირებულებები გააჩნია. ვისურვებდი, რომ უმაღლეს საბჭოსა და ჟურნალისტებს შორის ჩამოყალიბდეს ნორმალური, ადამიანური, კოორდინირებული მუშაობა და ურთიერთობა. შეიძლება ჟურნალისტი მიკერძოებულიც იყოს, ცალმხრივიც, მაგრამ მიუხედავად ამისა, ჩვენ არ გვაქვს უფლება არ ვცეთ ჟურნალისტის პროფესიას პატივი. თუ პროტესტი გვიჩნდება, მისი გამომჟღავნება სხვა ფორმებით უფრო მისაღებია ჩემთვის"_ განაცახდა ხაბაძემ.
შეგახსენებთ, რომ "ტელეარხ 25"-ის ჟურნალისტი უმაღლესი საბჭოს დეპუტატს ზეწოლაში ადანაშაულებს.ჯაბა ანანიძის თქმით კი, დეპუტატის მხრიდან მუქარის შემცველი სატელეფონო ზარი მასთან გუშინ, მას შემდეგ განხორციელდა, რაც ეთერში მის მიერ მომზადებული საგამოძიებო ფილმი ,,უმაღლესი კომფორტით" გავიდა. მისივე განცხადებით, საგამოძიებო ფილმი აჭარის უმაღლესი საბჭოს დეპუტატების მიერ გაწეულ ხარჯებსა და საკანონმდებლო ორგანოს საქმიანობის ეფექტურობას ეხებოდა.
