ვიცე-პრემიერი, ენერგეტიკის მინისტრი კახა კალაძე ბათუმში მომხდარ ინციდენტს გმობს და აცხადებს, რომ ხელისუფლებისთვის მიუღებელია ოპონენტების მიმართ ძალადობა.
"ყველანაირ ძალადობას ვგმობთ. კატეგორიულად მიუღებელია ჩვენთვის ოპონენტების მიმართ ასეთი დამოკიდებულება, იმის მიუხედავად, თუ რას აკეთებდნენ ცხრა წლის განმავლობაში და რას სჩადიოდნენ. ძალიან მძიმე იყო ეს ცხრა წელი ქვეყნის მოსახლეობისთვის, მაგრამ მიუხედავად ამისა, ყველანაირ ძალადობას ჩვენ ვგმობთ", - განაცხადა კალაძემ.
შეგახსენებთ, რომ გუშინ ფიზიკური და სიტყვიერი დაპირისპირება მოჰყვა ბათუმში "ნაციონალური მოძრაობის" ლიდერების წინასაარჩევნო შეხვედრას. რუსთაველის ქუჩაზე გიგა ბოკერიას, გიგი უგულავასა და გიორგი ბარამიძის ადგილობრივებთან შეხვედრისას ვითარება პოლიტპატიმრის სტატუსით გათავისუფლებული ჯემალ რუაძის და დავით ლორიას მისვლის შემდეგ დაიძაბა.
შეხლა-შემოხლა 10 წუთს გაგრძელდა. ვითარების განმუხტვის შემდეგ, "ნაციონალური მოძრაობის" ლიდერების წინასაარჩევნო შეხვედრა გაგრძელდა.
