საპატრიარქომ წმინდა სინოდის გუშინდელი სხდომის ოქმი გამოაქვეყნა, სადაც დეტალურად არის აღწერილი საკითხები, რომელიც სინოდის სხდომაზე იქნა განხილული. ოქმში ასევე მოცემულია გამოტანილი განჩინებები განხილულ საკითხებთან დაკავშირებით.
კერძოდ, წმინდა სინოდის განჩინებით, საკონსტიტუციო შეთანხმების საფუძველზე შეიქმნება ორმხრივი კომისია, რომელიც ეკლესიისთვის წარსადგენად აღწერს მუზეუმებში დაცულ სიწმინდეებს და საეკლესიო ნივთებს და მოამზადებს ინფორმაციას მათი მდგომარეობის შესახებ;
უცხოეთში მცხოვრები ქართველებისათვის ყველა სამრევლოში ჩამოყალიბდეს სულიერებისა და კულტურის ცენტრები და საკვირაო სკოლები. ასევე საქარველოში მოქმედ ტაძარებთან გაიხსნას საკვირაო სკოლები;
ყველა ეპარქიის მმართველმა მღვდელმთავარმა ყოველი წლის ბოლოს უნდა წარმოადგინოს მოხსენებითი ბარათი ეპარქიაში არსებული მდგომარეობის შესახებ. ასევე აუცილებელია, მას ჰყავდეს ეპარქიის მემატიანე, იურისტი და არქიტექტორი.
ეთხოვოს საქართველოში მომქმედ საერთაშორისო ორგანიზაციებს, საქართველოს სახელმწიფოს შესაბამის სტრუქტურებს და ასევე რუსეთის-საქართველოს დიალოგის ფორმატში მომქმედ ჯგუფს, რათა გაითვალისწინონ არსებული მდგომარეობა და თავის მხრივ, შესაძლებლობისამებრ, დაგვეხმარონ, რათა საქართველოს ეკლესიის ამ კანონიკურ ტერიტორიაზე ჩვენი ეკლესიის წარმომადგენლებს და მრევლს მიეცეთ მსახურების უფლება და გადაადგილების საშუალება.
წმინდა სინოდმა ასევე იმსჯელა ანტიდისკრიმინაციული კანონის შესახებ და კიდევ ერთხელ დაადასტურა თავისი უარყოფითი დამოკიდებულება. აღინიშნა, რომ ეს კანონი წარმოდგენილი სახით მიუღებელია როგორც საქართველოს ელესიისთვის, ისე ყველა მორწმუნისათვის.
კრებას თავმჯდომარეობდა სრულიად საქართველოს კათოლიკოს-პატრიარქი,მცხეთა-თბილისის მთავარეპისკოპოსი და ბიჭვინთისა და ცხუმ-აფხაზეთის მიტროპოლიტი ილია II.
