საქართველოს იუსტიციის მინისტრი თეა წულუკიანი თელავის იუსტიციის სახლში ადგილობრივი მედიის წარმომადგენლებს შეხვდა და მათ კითხვებს უპასუხა. ჟურნალისტების ძირითადი კითხვები თავისუფალი და სამართლიანი არჩევნებისათვის უწყებათაშორისი კომისიის მუშაობასა და მის მიერ გაცემულ რეკომენდაციებს ეხებოდა.
იუსტიციის მინისტრმა უცხოეთის მოქალაქეებზე ვიზების გაცემის პროცედურებსა და მის გამკაცრებაზეც ისაუბრა. როგორც თეა წულუკიანმა აღნიშნა, ევროკავშირთან დაახლოება საქართველოს ახალ პასუხისმგებლობას აკისრებს, რაც იმით გამოიხატება, რომ, თუკი ჩვენ გვინდა, ვიყოთ ევროკავშირის ღირსეული წევრი, ჩვენ ქვეყნის შიგნით უნდა ვმართოთ მიგრაციული პროცესები. სწორედ ამიტომ იუსტიციის სამინისტრომ მოამზადა ახალი კანონი მოქალაქეობის შესახებ, რომელიც აწესებს რეგულაციებს, რათა ზუსტად იცოდეს სახელმწიფომ, თუ ვინ რა მიზნით ჩამოდის საქართველოში.
იუსტიციის მინისტრმა სახელმწიფოს მხრიდან უცხოელი ინვესტორებისათვის მხარდაჭერასა და ტურიზმის ხელშეწყობაზეც ისაუბრა.
თეა წულუკიანმა ყურადღება გაამახვილა პროკურატურისა და სასამართლოს პოლიტიკური ზეგავლენისაგან განთავისუფლებაზეც. როგორც მინისტრმა აღნიშნა, იუსტიციის სამინისტრომ რამდენიმე ეტაპად დაგეგმა მართლმსაჯულების რეფორმა, რომლის მეორე ეტაპი ამჟამად მიმდინარეობს .
იუსტიციის მინისტრმა, ასევე, ისაუბრა იუსტიციის საბჭოს დეპოლიტიზებასა და მოსამართლეების საქმიანობის შეფასების პრინციპის დანერგვის შესახებ. თეა წულუკიანმა ჟურნალისტებს იმ კანონპროექტის დეტალები გააცნო, რომელიც იუსტიციის სამინისტროს „საერთო სასამართლოების შესახებ" კანონში შეაქვს და რომლის მიხედვითაც უვადო დანიშვნამდე მოსამართლეები სამწლიანი გამოსაცდელი ვადითა და შეფასების კრიტერიუმების დაკმაყოფილების შემთხვევაში დაინიშნებიან.
ჟურნალისტებთან შეხვედრისას მინისტრი არასრულწლოვანთა მართლმსაჯულების კოდექსსაც შეეხო. მისი თქმით, ეს არის მართლმსაჯულების სისტემის რეფორმის მესამე და ძალიან მნიშვნელოვანი ნაწილი, რომელიც „იუნისეფის" ბავშვთა ფონდის მხარდაჭერით ხორციელდება.
თეა წულუკიანმა ფარული მოსმენების თემასთან დაკავშირებით აღნიშნა, რომ აუცილებელია, დაწესდეს რეგულაციები, თუ რა შემთხვევაშია შესაძლებელი ფარული მიყურადება და რა შემთხვევაში იკრძალება ის.
„ძალოვან სტრუქტურებს დანაშაულთან ბრძოლის იარაღს თუ წავართმევთ, ისინი ვეღარ იმუშავებენ ეფექტურად, თუმცა, ეს უნდა მოხდეს ისე, რომ არ დაირღვეს ადამიანის უფლებები. მთავრობა მუშაობს, რომ დაიცვას ბალანსი დანაშაულის პრევენციისა და ადამიანის უფლებების დარღვევას შორის", - განმარტა მინისტრმა.
იუსტიციის მინისტრმა გააკეთა შეფასება მარიხუანას ლეგალიზაციასთან დაკავშირებით და აღნიშნა, რომ საქართველოს მთავრობა მსუბუქი ნარკოტიკული ნივთიერებების ლეგალიზებას არ გეგმავს. მისი განმარტებით, განსაკუთრებული სიმკაცრით უნდა დაისაჯონ ნარკოტიკული ნივთიერებების გამსაღებლები, ვიდრე მოქმედი კანონით ისჯებიან. რაც შეეხება მომხმარებლებს, სახელმწიფომ გაცილებით უფრო მეტი რამ უნდა შესთავაზოს მათ, ვიდრე ციხეში ჩასმაა. ანტინარკოტიკული საბჭოს ხელმძღვანელის განცხადებით, მთავრობა სწორედ ამ საკითხზე მუშაობს.