საქართველოს საგარეო საქმეთა მინისტრი, მაია ფანჯიკიძე შეხვდა საქართველოში ოფიციალური ვიზიტით მყოფ, ქიმიური იარაღის აკრძალვის ორგანიზაციის გენერალურ დირექტორს აჰმეთ უზუმჯუს, რომელიც მონაწილეობას იღებს ქიმიური, ბიოლოგიური, რადიაციული და ბირთვული (ქბრბ) მეცნიერებისა და შედეგების მართვის მსოფლიო კონგრესში - World Congress on CBRNe Science & Consequence Management.
შეხვედრისას საუბარი შეეხო საერთაშორისო უსაფრთხოებასა და მასობრივი განადგურების იარაღის გაუვრცელებლობასთან დაკავშირებულ საკითხებს. აღინიშნა ქიმიური იარაღის აკრძალვის ორგანიზაციის მნიშვნელობა და მისი როლი განიარაღებისა და გაუვრცელებლობის სფეროში.
მაია ფანჯიკიძემ ქიაო-ს გენერალურ დირექტორს გააცნო უკანასკნელ პერიოდში საქართველოს მიერ ქიმიური, ბიოლოგიური, რადიაციული და ბირთვული იარაღის გაუვრცელებლობისა და ექსპორტის კონტროლის კანონმდებლობის გაუმჯობესების თვალსაზრისით გადადგმული ნაბიჯების შესახებ. ასევე, მიულოცა ორგანიზაციას 2013 წელს მშვიდობის დარგში ნობელის პრემიის მიღება.