საქართველოში ამერიკის შეერთებული შტატების ელჩის რიჩარდ ნორლანდის შეფასებით, მნიშვნელოვანია, რომ ნატო-ს მომდევნო სამიტზე მოხდეს შესაბამისი დაფასება და საქართველოს მნიშვნელოვანი პროგრესის შეფასება.
აღნიშნულის თაობაზე ელჩმა ჟურნალისტებს ანგელა მერკელის გუშინდელი განცხადების კომენტირებისას განუცხადა, რომლის მიხედვითაც, საქართველოსთვის MAP-ის მინიჭების საკითხი ნატო-ს მომდევნო სამიტის თემა არ იქნება.
ნორლანდის თქმით, მოკავშირეები ამჟამად გადაწყვეტილების მიღების ეტაპზე არიან, როგორ მოხდეს საქართველოს მიერ გაწეული უზარმაზარი პროგრესის დაფასება.
"მიმაჩნია, რომ მოკავშირეები ამჟამად არიან იმ ეტაპზე, როდესაც იღებენ გადაწყვეტილებას, თუ როგორ მოხდეს დაფასება და სათანადო შეფასება იმ უზარმაზარი პროგრესის, რომელიც აქვს საქართველოს ნატო-ს წევრობის გზაზე ყველა აუცილებელი კრიტერიუმის დაკმაყოფილების მხრივ. კვირის ბოლოს იქნება შეხვედრა, სადაც მოკავშირე ქვეყნების წარმომადგენლები უელსის სამიტთან დაკავშირებით იმსჯელებენ. ჩემი აზრით, ძალიან მნიშვნელოვანია, რომ მოხდეს შესაბამისი დაფასება და შეფასება საქართველოს მნიშვნელოვანი პროგრესის", - განაცხადა რიჩარდ ნორლანდმა.
