აფხაზური საზოგადოება ძალიან მალე იდაყვზე იკბენს, როდესაც ხაჯიმბა აფხაზეთს სტავროპოლის მხარეს მიუერთებს. ეს განცხადება ყოფილმა სახელმწიფო მინისტრმა კონფლიქტების მოგვარების საკითხებში გოგა ხაინდრავამ აფხაზ სეპარატისტთა ლიდერის ალექსანდრე ანქვაბის გადადგომასთან დაკავშირებით სააგენტო „ჯი-ეიჩ-ენისათვის" მიცემულ კომენტარში გააკეთა.
„თუ ვინმე წარმოადგენს აფხაზეთის ინტერესს და თუ ვინმე არის აფხაზური სულის და ასე ვთქვათ, აფხაზური სახელმწიფოებრიობის ქადაქი, ეს ყოველთვის იყო ანქვაბი - მისგან განსხვავებით, ხაჯიმბა და მის გარშემო შეკრებილი ადამიანები, რომლებიც დღეს ე.წ. ოპოზიციას წარმოადგენენ მოსკოვის ინტერესების გამტარებლები იყვნენ ყოველთვის.
ხაჯიმბა არის რუსეთის „ეფ-ეს-ბეს" გენერალი, მას სამხრეები გაუკეთა პუტინმა თავისი ხელით, მანამდე პოლკოვნიკი იყო და არჩევნებისთვის, სპეციალურად იმისთვის, რომ მას მოეგო არჩევნები პუტინმა მას გენერლის წოდება მიანიჭა. მიუხედავად ამისა, აფხაზურმა საზოგადოებამ ყველა შემთხვევაში უარი უთხრა ხაჯიმბას", - აცხადებს ხაინდრავა და აღნიშნავს, რომ დღეს ცალსახად ცხადია, რომ რუსეთს აფხაზეთის მიერთება უნდა.
„აფხაზური ეთნოსისა და აფხაზი ხალხის ინტერესი, რუსეთს არასოდეს დაუცვია და არც ახლა აპირებს. ამის პირდაპირი წარმომადგენელია ხაჯიმბა. აბსოლუტურად სწორს იძახის ანქვაბი - ძალიან მალე აფხაზური საზოგადოება საკუთარ იდაყვზე კბენას დაიწყებს! იმიტო, რომ ხაჯიმბა პირდაპირ სტავროპოლის მხარეში შეიყვანს აფხაზეთს. ისედაც ძალიან დიდი ილუზია იყო თავის დროზე თანამედროვე სამყაროში აფხაზეთის დამოუკიდებლობა. ახლა ყირიმი დაიკარგა და უკრაინა კარგავს თავის ნაწილებს, მაგრამ, თუ რამე შანსი ჰქონდა აფხაზეთს, მას ჰქონდა შანსი ისეთის ადამიანების ხელში როგორი ადამიანიც ანქვაბი იყო",_ აცხადებს გოგა ხაინდრავა და ხაზგასმით აღნიშნავს, რომ ანქვაბი არასოდეს ყოფილა პროქართულად მოაზროვნე პოლიტიკოსი. „ვიანც ამას ლაპარაკობდა, იგივე თენგიზ კიტოვანის სახით - ისინიც მოსკოვის დავალებას ასრულებდდნენ. ყველა ის ადამიანი, რომელიც სახავდა ანქვაბს პროქართველ პოლიტიკოსად იყო ნებსით თუ უნებლიეთ რუსეთის ინტერესების მსახური - იმიტომ, რომ ანქვაბი არასოდეს არ ყოფილა პროქართული პოლიტიკოსი - ის იყო მხოლოდ და მხოლოდ პროაფხაზური პოლიტიკოსი.
სამწუხაროდ მოხდა ის რაც მოხდა - აფხაზებისთვის სამწუხაროდ, თორემ აფხაზეთი ვერასოდეს ვერ გახდება რუსეთის შემადგენელი ნაწილი, ის ყოველთვის საქართველოს ნაწილი იყო, არის და იქნება",_ აცხადებს გოგა ხაინდრავა სააგენტო „ჯი-ეიჩ-ენთან" საუბარში.
