აფხაზეთის ე.წ. ხელმძღვანელობა გადადგება, ახალი დაინიშნება თუ არა, ამას სამართლებრივი კუთხით არავითარი მნიშვნელობა არ აქვს , - განაცხადა ორშაბათის ტრადიციულ პრესკონფერენციაზე საგარეო საქმეთა მინისტრის მოადგილე დავით ჯალაღანიამ აფხაზეთში მიმდინარე მოვლენებისა და ალექსანდრე ანქვაბის გადადგომის შეფასებისას.
მისი თქმით, ნებისმიერი ე.წ. პოლიტიკური აქცია, რომელიც საქართველოს ოკუპირებულ ტერიტორიებზე იმართება არის არალეგიტიმიური და უკანონო, როგორც საქართველოს ასევე საერთაშორისო სამართლის პრინციპებით.
" რაც აფხაზეთში ხდება, არის იმ უკანონობის მორიგი გამოვლინება, რომელიც ახასიათებს ოკუპაციაში მყოფ ტერიტორიებს. ეს არის პირდაპირი შედეგი საოკუპაციო რეჟიმის, რომელიც რამდენიმე ხანია დიდ ტკივილად და პოლიტიკურ პრობლემად არის ჩვენს ქვეყანაში. არსებული ე.წ. ხელმძღვანელობა გადადგება, ახალი არჩევნები დაინიშნება თუ არა, ამას სამართლებრივი კუთხით არავითარი მნიშვნელობა არ აქვს", - განაცხადა დავით ჯალაღანიამ.
რაც შეეხება გალიდან ქართველების გამოსახლების საფრთხის არსებობას, ჯალაღანია არ გამორიცხავს, რომ ეთნიკური წმენდის მორიგ, შეიძლება ითქვას, საბოლოო ფაზასაც მოვესწროთ.
"მე არ მინდა ისე წარმოჩნდეს, რომ მთავრობამ დაიწყოს უკვე იმაზე ფიქრი, რომ ტერიტორიები გამოყოს და ბიუჯეტში სახსრები გაითვალისწინოს ამ ადამიანების განსასახლებლად, ჯერჯერობით ამის რაიმე ნიშანი გარდა დეკლარირებული ინფორმაციისა არ არის, თუმცა ეს ზრუნვის საგანია", - განაცხადა დავით ჯალაღანიამ.
მისივე თქმით, ამ სახის საფრთხეებთან დაკავშირებით უწყებას აქვს მუდმივი კომუნიკაცია პარტნიორებთან.
