იურისტი კახა კახიშვილის შეფასებით, გაუგებარია, რატომ არის დათა ახალაიას საქმე ბურუსით მოცული, თუმცა, იმის გამო, რომ საბერძნეთის სასამართლოს საბოლოო გადაწყვეტილება ჯერ არა აქვს მიღებული, რთულია შეფასდეს საქართველოს პროკურატურის მოქმედება.
როგორც კახიშვილმა "ჯი-ეიჩ-ენ"-ს უთხრა, ვიდრე დათა ახალაიას აღმკვეთი ღონისძიება აქვს შეფარდებული და საბერძნეთის ტერიტორიის დატოვების უფლება არ აქვს, საქართველოს პროკურატურამ შესაბამისი მასალები უნდა მიაწოდოს საბერძნეთის სასამართლოს, რათა სასამართლომ ექსტრადიციის საკითხი გადაწყვიტოს.
ის ფაქტი, რომ დათა ახალაია საბერძნეთში დააკავეს, ჩვენთვის, არა პროკურატურის მხრიდან, არამედ მესამე პირების დახმარებით გახდა ცნობილი. გაუგებარია, რატომ არის ბურუსით მოცული დათა ახალაიას საქმე. კონკრეტულად, როცა საექსტრადიციო საკითხი იხილება, პირველ რიგში დგინდება, ის ქმედება, რომლის გამოც პიროვნება პასუხისგებაშია მიცემული, ისჯება თუ არა იმ ქვეყანაში, სადაც პიროვნებაა დაკავებული. შემდეგ, სასამართლო არკვევს, არის თუ არა დევნა პოლიკური ან სხვა მოტივით, რის შემდეგაც, სასამართლო იღებს გადაწყვეტილებას ექსტრადაციის შესახებ,"-განაცხადა კახიშვილმა.
მისივე ვარაუდით, დათა ახალაიას ადვოკატები, პოლიტიკურ მოტივებზე ააგებენ მის დაცვას, წაიღებენ ბაჩო ახალაიას საქმესაც, რომელსაც დაემატება „ნაციონალების" მიერ მომზადებული დოკუმენტაცია, რომ ახალაია მათი სახე, ლიდერია.
"თუ მთავარი პროკურატურა საბერძნეთის სასამართლოს გაუგზავნის მყარ მასალებს, დათა ახალაიას ექსტრადირების საკითხი გადაწყდება",-აღნიშნა კახიშვილმა.
დათა ახალია საბერძნეთში რამდენიმე თვის წინ დააკავეს. იგი საბერძნეთიდან იტალიაში ყალბი საბუთებით გადასვლას ცდილობდა.
საბერძნეთის სასამართლომ კუდის ყოფილი უფროსი დათა ახალაია ორი დღის წინ გაათავისუფლა, ხოლო საქართველოში ექსტრადირების საკითხი ორ თვეში გადაწყდება.
