აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია არ გამორიცხავს, რომ აფხაზეთში მიმდინარე კრიზისის შედეგად რამდენიმე გამგებელმა თანამდებობა დატოვოს. კერძოდ, საუბარია გალისა და ტყვარჩელის გამგებლებზე. როგორც ჟურნალისტებთან ყოლბაიამ განაცხადა, აფხაზეთში მიმდინარე პროცესებში რუსეთის წვლილი დიდია, თუცა მთავარი განმსაზღვრელი ფაქტორი მძიმე სოციალური პირობებია.
,,არა მგონია, ,,სისხლიანი საკადრო" ცვლილებები იყოს, მაგრამ რამდენიმე თანამდებობის პირს მოუწევს წასვლა. უკვე გაჟღერდა, რომ რამდენიმე რაიონის პირველი პირი წავა, ისევე როგორც პროკურატურაშია მოსალოდნელი სერიოზული ცვლილებები", _განაცხადა ყოლბაიამ, საგარეო უწყების დატოვების შემდეგ.
აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა საგარეო საქმეთა სამინისტროს აფხაზეთში არსებულ ვითარებაზე ინფორმაცია მიაწოდა.
