კოალიცია "ნინო ბურჯანაძე - ერთიანი ოპოზიციის" ლიდერის ნინო ბურჯანაძის განცხადებით, მართალია, წინასაარჩევნო პერიოდში აღარ არის ისეთი ფიზიკური, მორალური და ემოციური წნეხი, როგორიც იყო "ნაციონალური მოძრაობის" დროს, მაგრამ არჩევნების წინა პერიოდი ნამდვილად არ არის სამართლიანი და დემოკრატიული.
როგორც ნინო ბურჯანაძემ დღევანდელ პრესკონფერენციაზე განაცხადა, არსებული მონაცემებით, თბილისის მერობის კანდიდატი დიმიტრი ლორთქიფანიძე ნამდვილად იგებს არჩევნებს და კოალიციას აქვს დიდი შესაძლებლობა იმისა, რომ ამ ადგილობრივ თვითმმართველობის არჩევნებზე უსერიოზულესი შედეგი დააფიქსიროს.
"მინდა, პირდაპირ ვუთხრა ხელისუფლებას, თუ ხმები დაითვლება ისე, როგორც ეს მოხდა საპრეზიდენტო არჩევნების დროს, საზოგადოება ამას ნამდვილად არ მოითმენს. საპრეზიდენტო არჩევნების დროს მე ვიყავი ის ადამიანი, ვიზეც მუშაობდა პარტია, ჩვენი მომხრეები და ბუნებრივია, ადვილად შემეძლო მიმეღო გადაწყვეტილება იმასთან დაკავშირებით, რომ შევგუებოდით უსამართლო შედეგს იმისათვის, რომ თავიდან მოგვეშორებინა "ნაციონალური მოძრაობა". მაგრამ დღეს სხვა რეალობაა. ათასობით ადამიანი იბრძვის იმისთვის, რომ გახდნენ დეპუტატები, ან გამგებლები და ეს ადამიანები უსამართლობას ნამდვილად არ შეეგუებიან", - განაცხადა ნინო ბურჯანაძემ.
მისივე თქმით, მათ ერთადერთი რამ სურთ - მართლაც სამართლიანი და დემოკრატიული არჩევნები.
ბურჯანაძის თქმით, პრემიერ - მინისტრი, რომელიც ამავდროულად არის კოალიციის ლიდერი, თავის სამუშაო დროს და სახელმწიფოებრივ რესურსებს იყენებს იმისათვის, რომ რეგიონებში წარადგინოს კოალიციის მაჟორიტარი დეპუტატები და "რუსთავი 2"-ზე, "პირველ არხზე", "იმედზე" - 20, 25 და ზოგჯერ 40 წუთიც კი ეთმობა მათ სიუჟეტებს.
"ეს არის პირდაპირი გამოყენება ადმინისტრაციული რესურსისა, რაც აკრძალულია კანონით და ჩვენ გვაყენებს დისკრიმინაციულ მდგომარეობაში. არც ერთი ჩვენი ღონისძიების არათუ პირდაპირი ჩართვა არ ყოფილა, არამედ ჩვენ პრაქტიკულად ვართ იმ ფაქტის წინაშე, რომ როდესაც დღეში მინიმუმ 5 შეხვედრა გვაქვს, ერთ ღონისძიებაზე მეტის გაშუქება არ ხდება. ასეთ ვითარებაში იმაზე საუბარი, რომ საარჩევნო გარემო თანაბარია, რა თქმა უნდა, შეუძლებელია", - თქვა ბურჯანაძემ.
