,,მინდა სრული პასუხისმგებლობით განვაცხადო, რომ დღეს ქართული სახელმწიფო აცნობიერებს დიასპორის უდიდეს როლს და მნიშვნელობას", _განაცხადა პრემიერ-მინისტრმა ირაკლი ღარიბაშვილმა კონფერენციაზე "ქართული დიასპორის დღეები 2014" სიტყვით გამოსვლისას.
მისივე განმარტებით, ქართულ დიასპორას, თავისი კვალიფიკაციით, პროფესიული უნარ-ჩვევებით და გამოცდილებით ბევრი სიკეთის მოტანა შეუძლია.
,,საქართველოს ჰყავს წარმატებული დიასპორა. ამას მოწმობს თუნდაც დღევანდელი კონცერტი, რომელშიც საზღვარგარეთ მოღვაწე ჩვენი თანამემამულეები იღებენ მონაწილეობას. მათ შორის ბევრია ისეთი, რომელმაც მსოფლიო აღიარება მოიპოვა, და ჩვენ ეს გვეამაყება.მაგრამ, არის მეორე მხარეც. გაჭირვებამ და უმუშევრობამ წლების წინ ათასობით ჩვენი თანამემამულე წაიყვანა უცხო მხარეში გადარჩენისთვის, ოჯახების რჩენისთვის. მათ აქვთ საკმარისი კვალიფიკაცია, თუმცა საკუთარმა სახელმწიფომ ვერ შეძლო მათი სათანადოდ დაცვა. დარწმუნებული ვარ, რომ ამ ადამიანებს უსაზღვროდ უყვართ თავისი ქვეყანა, და თუ ჰკითხავთ, რა არის მათი ოცნება, უმრავლესობა გიპასუხებთ, რომ მათი ოცნება სამშობლოში დაბრუნება და საკუთარ ქვეყანაში ღირსეული ადგილის დამკვიდრებაა. სხვაგვარად, - წარმოუდგენელია.მინდა სრული პასუხისმგებლობით განვაცხადო, რომ დღეს ქართული სახელმწიფო აცნობიერებს დიასპორის უდიდეს როლს და მნიშვნელობას. ქართულ დიასპორას აქვს ძალიან დიდი პოტენციალი - ადამიანური კაპიტალი, ჩვენი მთავარი რესურსი, რომელიც გაფანტულია მთელ მსოფლიოში. ქართულ დიასპორას, თავისი კვალიფიკაციით, პროფესიული უნარ-ჩვევებით და გამოცდილებით ბევრი სიკეთის მოტანა შეუძლია ქვეყნისთვის. სახელმწიფომ უნდა გამოიყენოს მათი პოტენციალი და ყველაფერი გააკეთოს იმისათვის, რომ მათი ძალა, ენერგია, ინტელექტუალური რესურსი და შრომისმოყვარეობა ჩვენი ქვეყნის პროგრესისკენ და კეთილდღეობისკენ იყოს მიმართული. ჩვენ გვაქვს პოლიტიკური ნება, რომ ეს ადამიანები სამშობლოს სამსახურში ჩავაყენოთ", _განაცხადა ღარიბაშვილმა.
