საგარეო საქმეთა სამინისტროში საზღვარგარეთ საქართველოს საპატიო კონსულების შეხვედრა გაიმართა. საპატიო კონსულები საქართველოს საგარეო საქმეთა მინისტრს და სამინისტროს ხელმძღვანელობას შეხვდნენ.
შეხვედრაზე საუბარი შეეხო საპატიო კონსულების ინსტიტუტის მნიშვნელობას, კონსულების მიერ განხორციელებულ ღონისძიებებს, სამომავლო საქმიანობის საკითხებს. სამინისტროს ხელმძღვანელობამ საპატიო კონსულებს ინფორმაცია მიაწოდა საქართველოს ხელისუფლების საქმიანობის, ბოლო პერიოდში განხორციელებული რეფორმების, საგარეო პოლიტიკის პრიორიტეტების, საქართველოს ევროპული და ევროატლანტიკური ინტეგრაციის პროცესის შესახებ. ერთ-ერთი დავალება, რომელიც საქართველოს საპატიო კონსულებმა საგარეო უწყებისაგან მიიღეს, ინვესტიციების მოზიდვის საკითხზე მუშაობაა.
"საპატიო კონსულების შეკრება საგარეო საქმეთა სამინისტროს კიდევ ერთი, ახალი ინიციატივაა, რომლიც გვსურს, რომ ტრადიციად ჩამოყალიბდეს და ყოველწლიურად გაიმართოს. საქართველოს ჰყავს 21 საპატიო კონსული და მათგან ცამეტი ჩამოვიდა საქართველოში" - განაცხადა მაია ფანჯიკიძემ.
დღესვე საპატიო კონსულები მონაწილეობას მიიღებენ დამოუკიდებლობის დღისადმი მიძღვნილ საზეიმო ღონისძიებებში.
აღსანიშნავია, რომ ქართული დიპლომატიის ისტორიაში, საქართველოს საპატიო კონსულების შეკრება პირველად ხდება.
