„საქართველოს პრეზიდენტის პოზიციაა, რომ ასოცირების შესახებ შეთანხმებას ხელი უნდა მოაწეროს პრეზიდენტმა", - აღნიშნულის შეხსახებ განცხადებას პრეზიდენტის ადმინისტრაციის უფროსი ლაშა აბაშიძე აკეთებს.
აბაშიძის განმარტებით, შეთანხმების სტრატეგიული და მაღალი მნიშვნელობიდან გამომდინარე, პრეზიდენტი სიტუაციის გართულებას არ გეგმავს და მსგავსი საკითხის დღის წესრიგში დაყენებას არ აპირებს.
„საქართველოს პრეზიდენტის პოზიციაა, რომ ასოცირების შესახებ შეთანხმებას ხელი უნდა მოაწეროს პრეზიდენტმა, მაგრამ ამ შეთანხმების სტრატეგიული და მაღალი მნიშვნელობიდან გამომდინარე, ამის რაიმე გართულებას, გამწვავებას ან, ასე ვთქვათ, გამოდავებას და მსგავსი საკითხის დღის წესრიგში დაყენებას არ აპირებს. კონსულტაციები ამ თემასთან დაკავშირებით პრეზიდენტთან, როგორც მოგახსენეთ, არ გამართულა", - აცხადებს აბაშიძე.
ევროკავშირთან ასოცირების ხელშეკრულებას საქართველოს პრემიერ-მინისტრი ირაკლი ღარიბაშვილი მოაწერს ხელს. ამის შესახებ, ჟურნალისტებთან მთავრობის საპარლამენტო მდივანმა შალვა თადუმაძემ განაცხადა.
,,მიუხედავად იმისა, რომ კონსტიტუციის თანახმად, საქართველოს პრეზიდენტი წარმოადგენს საქართველოს საგარეო ურთიერთობებში, სხვა სახელმწიფოებთან და საერთაშორისო ორგანიზაციებთან მოლაპარაკების წარმოებისათვის, საქართველოს კონსტიტუციის 73-ე მუხლის თანახმად, მას ესაჭიროება საქართველოს მთავრობის თანხმობა.
„საქართველოს საერთაშორისო ხელშეკრულებების შესახებ" საქართველოს კანონის მე-11 მუხლის შესაბამისად, საერთაშორისო ხელშეკრულებების თაობაზე მოლაპარაკების გამართვისა და მათი ხელმოწერის შესახებ გადაწყვეტილებას იღებს მთავრობა.აღნიშნული ტიპის ხელშეკრულების ხელმოწერაზე საქართველოს პრეზიდენტი უფლებამოსილი იქნებოდა მხოლოდ მაშინ, თუ მას შესაბამისი გადაწყვეტილება ექნებოდა მიღებული მოლაპარაკების გამართვის თაობაზე. გამომდინარე იქიდან, რომ საქართველოს კონსტიტუციის 73-ე მუხლის შესაბამისად, ევროკავშირთან მოლაპარაკებებს არ აწარმოებდა საქართველოს პრეზიდენტი, მოქმედი კანონმდებლობის თანახმად, ის მოკლებულია შესაძლებლობას მთავრობის თანხმობისა და შემდგომში პრემიერ-მინისტრის კონტრასიგნაციის გარეშე ხელი მოაწეროს ასოცირების ხელშეკრულებას.
რაც შეეხება ხელმოწერის პროცედურას, პრეზიდენტის მხრიდან ხელშეკრულების ხელმოწერის შემთხვევაში, ხელმოწერა ვერ შეიძენს იურიდიულ ძალას პრემიერ-მინისტრის კონტრასიგნაციის (თანახელმოწერის) გარეშე, რაც საერთაშორისო ასპარეზზე გარკვეულ გაუგებრობას გამოიწვევს, რადგან მსგავსი სახის ხელშეკრულებები იურიდიულ ძალას იძენს ხელმოწერის მომენტიდან.
ამასთან, „საქართველოს საერთაშორისო ხელშეკრულებების შესახებ" საქართველოს კანონის მე-12 მუხლის შესაბამისად, საქართველოს პრემიერ-მინისტრს უფლება აქვს, განახორციელოს საერთაშორისო ხელშეკრულების დადებასთან დაკავშირებული ყველა სახის მოქმედება უფლებამოსილების წარდგენის გარეშე.აღსანიშნავია, რომ მთავრობამ წარმართა მოლაპარაკებების პროცესი ხელშეკრულების ხელმოწერამდე, ასევე მთავრობაა პასუხისმგებელი ხელშეკრულებით ნაკისრი ვალდებულებების შერულებაზე", _განაცახდა თადუმაძემ.
შეგახსენებთ, რომ საქართველოსა და ევროკავშირს შორის ასოცირების შეთანხმება 27 ივნისს გაფორმდება.