გაეროს ადამიანის უფლებათა უმაღლესი კომისრის ნავი პილაის შეფასებით, სამხრეთ ოსეთის დე ფაქტო რესპუბლიკა იქცა "ერთ-ერთ ყველაზე მიუწვდომელ ადგილად დედამიწაზე".
მისივე განცხადებით, გარკვეული მოძრაობა შეინიშნება აფხაზეთის დე ფაქტო რესპუბლიკის მიმართულებით და საერთაშორისო სააგენტოები თუ დევნილები მიმოსვლას ახერხებენ, მაგრამ ვითარება რთულია ორივე ოკუპირებულ ტერიტორიაზე.
გაეროს უმაღლესი კომისარი ნავი პილაი რამდენიმე დღით სტუმრობდა საქართველოს, რის შემდეგაც თბილისში მედიის წარმომადგენლებთან შეხვედრაზე განაცხადა, რომ
აფხაზეთსა და სამხრეთ ოსეთში მცხოვრები ადამიანები ვერ სარგებლობენ ადამიანის ძირითადი უფლებების პერსპექტივითა და კანონის უზენაესობასთან დაკავშირებული რეფორმებით, რაც ამჟამად ხორციელდება საქართველოს მოქალაქეებისთვის.
კომისრის შეფასებები გამოქვეყნდა უმაღლესი კომისრის ოფისის ოფიციალურ ვებსაიტზეც, სადაც საგანგებოდ არის აღნიშნული, რომ მან, რამდენიმე მცდელობის მიუხედავად, ვერც ერთხელ ვერ მოიპოვა ნებართვა, მოენახულებინა საქართველოს ოკუპირებული რეგიონები.
გაეროს უმაღლესი კომისარი ასევე აღნიშნავს, რომ, თავისუფალი მიმოსვლის შეზღუდვის კვალდაკვალ, სამხრეთ ოსეთის იზოლაცია მეტად განმტკიცდა ბოლო თვეების განმავლობაში, რაც კიდევ უფრო აუარესებს ადამიანის უფლებების მდგომარეობას:
"განსაკუთრებით შეშფოთებული ვარ სამხრეთ ოსეთში ამჟამად მცხოვრები ადამიანების უფლებრივი მდგომარეობით. ანგარიშებში გადმოცემულია, რომ ცხოვრების პირობები მძიმეა და სულ უფრო და უფრო მძიმდება, რის შედეგადაც ირღვევა ხსენებული პირების ეკონომიკური, სოციალური და კულტურული უფლებები. სამხრეთ ოსეთი გადაიქცა შავ ხვრელად: ძალიან მცირედია ცნობილი იმაზე, თუ რა ხდება რეგიონის შიგნით" -აცხადებს პილაი.
