საგარეო საქმეთა მინისტრი მაია ფანჯიკიძე რუსეთის საგარეო საქმეთა სამინისტროს ოფიციალური წარმომადგენლის ალექსანდრე ლუკაშევიჩის განცხადებას ეხმიანება და აცხადებს, რომ საქართველო არავის წინააღმდეგ არ დებს ხელშეკრულებას ევროკავშირთან.
,,ჩვენ არავის წინააღმდეგ არ ვერთიანდებით, ჩვენ არავის წინააღმდეგ არ ვდებთ ამ ხელშეკრულებას ევროკავშირთან. ხელშეკრულება იდება იმისთვის რომ ჩვენი ქვეყანა გახდეს უფრო კარგი, გახდეს უფრო დემოკრატიული, გახდეს უფრო აყვავებული და უფრო საინტერესო ნებისმიერი მეზობლისთვის", _განაცხადა ფანჯიკიძემ.
რუსეთის საგარეო საქმეთა სამინისტრო საქართველოს მიერ ევროკავშირთან ასოცირების ხელშეკრულებას არასასურველად მიიჩნევს და ოფიციალურ თბილისს დაფიქრებისკენ მოუწოდებს. როგორც რუსეთის საგარეო საქმეთა სამინისტროს ოფიციალურმა წარმომადგენელმა ალექსანდრე ლუკაშევიჩმა განაცხადა, საქართველოს ხელისუფლებამ უნდა გაათვითცნობიეროს ხელშეკრულების ხელმოწერის შედეგები.
„გასათვითცნობიერებელ" საკითხებს შორის ლუკაშევიჩმა ორმხრივი და სავაჭრო ურთიერთობები დაასახელა. მან ასევე აღნიშნა, რომ რუსეთი დღეისთვის საქართველოსთვის სავაჭრო ბრუნვით მესამე პარტნიორია და მიანიშნა, რომ საქართველოს არ უნდა უღირდეს ამ რეალობის დაკარგვა.
„აუცილებელია შედეგების გაცნობიერება, რომელიც შეიძლება მოყვეს საქართველოსა და ევროკავშირს შორის ასოცირების ხელშეკრულების ხელმოწერას... ეს ეხება როგორც ჩვენს ორმხრივ ურთიერთობებს, ასევე საფინანსო და ეკონომიკურ შედეგებს, რომელზედაც მოგვიწევს მუშაობა, საქართველოსა და ევროკავშირს შორის შეთანხმების ფაქტორის გათვალისწინებით", - განაცხადა ლუკაშევიჩმა.
მან ასევე აღნიშნა, რომ ყველა სახელმწიფომ ნაბიჯის გადადგმის დროს უნდა გააცნობიეროს და გათვალოს არა მხოლოდ ურთიერთქმედებებით გამოწვეული უპირატესობა ამა თუ იმ საერთაშორისო ორგანიზაციასთან და სტრუქტურასთან თანამშრობლობისას, არამედ „დაფიქრდეს იმ ნაბიჯებზე, რომლის გადადგმა მოუწევთ იმ ქვეყნებს, რომელთაც მათთან ორმხრივი ურთიერთობა აქვთ".
