„ადამიანი, კანონი, თავისუფლება" 19 მაისს ფალიაშვილის ქუჩა #33ა-ში მდებარე საცხოვრებელ კორპუსში, #55-ე საჯარო სკოლაში, ილიას სახელმწიფო უნივერსიტეტსა და მე-2 საჯარო სკოლაში ნაღმის არსებობის შესახებ გავრცელებული ცრუ ინფორმაციას პოლიტიკური ჯგუფების მიერ დაგეგმილ მიზანმიმართულ კამპანიად მიიჩნევს. ორგანიზაცია საზოგადოებას ახსენებს 2013 წლის საპრეზიდენტო არჩევნებამდე დაახლოებით 1 თვით ადრე გახშირებულ ცრუ სატელეფონო ზარების ფაქტებს. იმ დროისათვის ცრუ განგაშით გამოწვეულმა ვნებათაღელვამ საზოგადოებაში დაუცველობის და ტერორიზმის საფრთხის განცდა გააჩინა. აღნიშნული საკითხის მოგვარებას საკანონმდებლო ცვლილებები დასჭირდა, რომელმაც ეს ტალღა შეაჩერა, თუმცა, როგორც ჩანს, დროებით.
„ადამიანი, კანონი, თავისუფლებას" იურისტის, ბექა გამდლიშვილის განცხადებით 19 მაისს დაფიქსირებული ცრუ განგაში გვაფიქრებინებს, რომ საზოგადოებაში შიშის დანერგვით დაკავებულია ანტისახელმწიფოებრივი ძალები, რომლებიც კონკრეტული თანხის სანაცვლოდ სჩადიან აღნიშნულ ქმედებას. 2013 წლის 4 ოქტომბერს, ჩვენს მიერ გამოთქმულ იქნა მოსაზრება, რომ მსგავსი ფაქტები გამოძიებას საჭიროებდა, რადგან ჩადენილი ქმედება არ გავდა კანონის არმცოდნე ბავშვის გულუბრყვილო ხუმრობას. სამწუხაროდ, ჩვენი ეს მოსაზრება დღეს კიდევ უფრო გამყარდა. არსებობს საფუძვლიანი ეჭვი იმისა, რომ ამ ყველაფრის უკან მართლაც კონკრეტული პიროვნებები და ჯგუფები დგანან. ამის არგუმენტად შესაძლებელია მოვიყვანოთ ის გარემოება, რომ თავად ის პიროვნებები, რომლებმაც პირადად უპასუხეს ამ სატელეფონო ზარს, საუბრობენ იმაზე, რომ ზარის განმახორციელებლის ხმა იყო შეცვლილი და არ ჰგავდა რეალურს.
ბექა გამდლიშვილის განმარტებით მსგავსი ხასიათის ზარები საზოგადოებას არ ახსოვს „ნაციონალური მოძრაობის" მმართველობის პერიოდში, მაშინ, როდესაც მსგავსი დანაშაული პრაქტიკულად დასჯადიც კი არ იყო. რატომღაც კანონის ნაკლები სიმკაცრე მხოლოდ 2012 წლის საპარლამენტო არჩევნების შემდეგ გამოიკვეთა. საყურადღებოა ის გარემოებაც, რომ საპრეზიდენტო არჩევნების შემდეგ, ამ დრომდე არც ერთი მსგავსი ფაქტი არ დაფიქსირებულა.
ყოველივე ზემოაღნიშნული გვაფიქრებინებს, რომ ცრუ შეტყობინებებს კამპანიური ხასიათი აქვს და საზოგადოებაში შიშის დანერგვას ემსახურება, რათა ამომრჩეველში დაუცველობის და სახელმწიფო სტრუქტურების უმოქმედობის განცდა გაჩნდეს. შესაძლოა მსგავსი ფაქტები უშუალოდ არჩევნების მიმდინარეობისას განმეორდეს, რაც საარჩევნო პროცესის შეფერხებას გამოიწვევს.
მივმართავთ შინაგან საქმეთა სამინისტროს, დაუყოვნებლივ დაიწყოს ძიება ა/წ 19 მაისისა და წინა წლის ფაქტებთან დაკავშირებით, რათა დადგინდეს რეალურად ვინ დგას აღნიშნული კამპანიის უკან.
