ზაფხულის მოახლოებასთან ერთად ბათუმის საერთაშორისო აეროპორტში ფრენების რაოდენობა იზრდება. აჭარის ტურიზმის დეპარტამენტის ინფორმაციით, რეგულარულ ფრენებს ამ ეტაპზე ახორციელებს "Turkish Airlines" (ყოველ დღე), "Belavia" კვირაში 2-ჯერ (მინსკი-ბათუმის ფრენები სეზონზე კვირაში 4-ჯერ იგეგმება). "Georgian Airways" კვირაში 2-ჯერ ბათუმი-მოსკოვის მიმართულებით ახორციელებს ფრენებს, რომელსაც სეზონზე სიბირის ავიახაზების "S7"-ის მიერ კვირაში ერთხელ შესრულებული ფრენა დაემატება. კვირაში 4-ჯერ ხორციელდება ასევე ბათუმი-თბილისის ფრენები.
„რაც შეეხება ჩარტერულ ავიაფრენებს, წელს მათი რაოდენობა განსაკუთრებითაა გაზრდილი. შესაბამისად, რეგიონში ტურისტთა რაოდენობის ზრდაა მოსალოდნელი. მაისის ბოლოდან ოქტომბრის ბოლომდე კვირაში 2-ჯერ განხორციელდება თელავივი-ბათუმის ფრენები, რომლის ფარგლებში რეგიონს კვირაში დაახლოებით 260 დამსვენებლი ესტუმრება ისრაელიდან"- აცხადებენ აჭარის ტურიზმის დეპარტამენტში.
უწყების ინფორმაციითვე, გაორმაგებული იქნება ჩარტერული ფრენების რაოდენობა პოლონეთიდან ბათუმის მიმართულებითაც, 7 ივნისიდან კვირაში 1-ჯერ ვარშავა-ბათუმის ფრენები დაიწყება, 13 ივნისიდან კატოვიცე-ვარშავა-ბათუმი, ხოლო 14 ივნისიდან კატოვიცე-პოზნანი-ბათუმის ფრენები. აჭარის ტურიზმისა და კურორტების დეპარტამენტის მიერ წარმოებული მოლაპარაკებებისა და სარეკლამო კამპანიის ფარგლებში 2014 წლის სეზონზე პოლონეთიდან ყოველკვირეულად 3 ჩარტერული ფრენა განხორციელდება.
საერთაშორისო ფრენებს ააქტიურებს ასევე უკრაინული ავიაკომპანია "Ukraine Internatinal Airlines", რომელიც ივნისის შუა რიცხვებიდან კვირაში 4-ჯერ, აქტიურ სეზონზე კი კვირაში 6-ჯერ გეგმავს ფრენებს კიევი-ბათუმის მიმართულებით.
