პერსონალურ მონაცემთა დაცვის ინსპექტორის უფლებამოსილება შესაძლოა გაიზარდოს. ამას ითვალსიწინებს ფარულ მოსმენებთან დაკავშირებული კანონპროექტი, რომელიც პარლამენტის იურიდიულ საკითხთა კომიტეტში განიხილევს.
როგორც კომიტეტის სხდომაზე კანონპროექტის მომხსენებელმა შალვა შავგულიძემ განაცხადა, უფლებამოსილების გაზრდით პერსონალურ მონაცემთა დაცვის ინსპექტორის ინსტიტუტი უფრო ეფექტური გახდება.
კანონპროექტის მიხედვით გათვალისწინებულია, რომ პერსონალურ მონაცემთა დაცვის ინსპექტორი არა მთავრობამ დანიშნოს, არამედ პარლამენტმა აირჩიოს.
"ინსპექტორი არჩეული იყოს პარლამენტის მიერ და არ მოხდეს მისი დანიშვნა აღმასრულებელი ხელისუფლების მხრიდან. შესაბამისად, ის ანგარიშვალდებული იქნება პარლამენტის წინაშე და აღარ გაჩნდება კითხვები მის მიერ აღმასრულებელი ხელისუფლების ეფექტურად შემოწმებასთან დაკავშირებით. არსებული კანონმდებლობით, ინსპექტორს, ერთი მხრივ, არ აქვს სამართალდამცავ სისტემაში არსებულ მონაცემთა დამუშავებისა და კონტროლის უფლება, მეორე ნორმით კი, კი თითქოს ეძლევა ამგვარი უფლება, უბრალოდ სამართალდამცავ ორგანოს ამის შესახებ წინასწარ, სამი დღით ადრე უნდა შეატყობინოს," - განაცხადა შალვა შავგულიძემ.
კანონპროექტის მიხედვით, უქმდება ინსპექტორის მიერ ინფორმაციის გამოსათხოვად სამართალდამცავი უწყების წინასწარ, სამი დღით ადრე გაფრთხილების ნორმაც და მისთვის ხელმისაწვრობი ხდება ფარულ საგამოძიებო მოქმედებებზე განჩინებები, ასევე ელექტრონული კომუნიკაციის კომპანიები ხდებიან ვალდებულნი მას მიაწოდონ ის ინფორმაცია (არა შინაარსი, არამედ პირთა მაიდენტიფიცირებელი მონაცემები), რომელიც სამართალდამცველებს გადასცეს.
