ევროპის რეკონსტრუქციისა და განვითარების ბანკის დირექტორთა საბჭოს ყოველწლიური შეხვედრისა და ბიზნესფორუმის ფარგლებში, ფინანსთა მინისტრმა ნოდარ ხადურმა მაღალი დონის ორმხრივი შეხვედრები გამართა. ფინანსთა მინისტრი შეხვდა EBRD-ის მმართველ დირექტორს თურქეთში, აღმოსავლეთ ევროპის, კავკასიისა და ცენტრალური აზიის ქვეყნებში ოლივიე დაკამს. შეხვედრაზე მხარეებმა ისაუბრეს ევრობანკის მხარდაჭერით საქართველოში მიმდინარე და სამომავლოდ დაგეგმილ პროექტებზე.
„საქართველოსა და ევრობანკს შორის თანამშრომლობა არის საუკეთესო, რაც ოდესმე გვქონია. იგი ეფუძნება მრავალი წლის ურთიერთობებს. ყოველწლიურად, ჩვენი მხრიდან საქართველოში კაპიტალდაბანდების მოცულობა დაახლოებით 150-200 მლნ ევროს შეადგენს. ამჟამად ვმუშაობთ რამდენიმე მნიშვნელოვან საკითხზე, მათ შორის, საქართველოს ხელისუფლების მიერ შემუშავებულ ეკონომიკურ სტრატეგიაზე და იმაზე, თუ რა როლი შეგვიძლია შევიტანოთ მის განხორციელებაში. ასევე, რაც ძალიან მნიშვნელოვანია - თითოეული ჩვენგანი მოუთმენლად ელის მომავალ წელს, როცა ევრობანკის 23 წლის არსებობის მანძლიზე, პირველად კავკასიის რეგიონში, თბილისი უმასპინძლებს ევროპის რეკონსტრუქციისა და განვითარების ბანკის ყოველწლიურ შეხვედრას," - განაცხადა EBRD-ის მმართველმა დირექტორმა.
დღესვე ფინანსთა მინისტრი შეხვდა ევროპის საინვესტიციო ბანკის ვიცე-პრეზიდენტის ვილჰელმ მოლტერერს. შეხვედრაზე განიხილეს ბანკის უახლოესი გეგმები საქართველოში როგორც ინფრასტრუქტურული პროექტების განხორციელების, ისე კერძო სექტორში ინვესტირებას მიმართულებით. საუბარი ასევე შეეხო ევროკომისიის პრეზიდენტის ჟოზე მანუელ ბაროზოს დაგეგმილ ვიზიტს საქართველოში, რომელიც მიმდინარე წლის ივნისში შედგება.
დღევანდელ სესიაზე ფინანსთა მინისტრი ნოდარ ხადური EBRD-ის მმართველთა საბჭოს თავმჯდომარის მოადგილედ აირჩიეს.
