ევროპასთან ინტეგრაციის საპარლამენტო კომიტეტის თავმჯდომარე ვიქტორ დოლიძემ დეპუტატებს პარლამენტის პლენარულ სხდომაზე კოლეგებს აცნობა, რომ ევროკავშირთან ასოცირების შესახებ ხელსეკრულებას ხელი 27 ივნისს მოეწერება.
"ჩვენ ამ ვალდებულებებს აუცილებლად შევასრულებთ, მაგრამ ამავე დროს, ეს არ არის ცალმხრივი ვალდებულება. დარწმუნებული ვარ, რომ ევროკავშირიც მას აუცილებლად შეასრულებს. ეს აბსოლუტურად სხვა გარემოს შექმნის ქვეყანაში",, - განაცხადა ვიქტორ დოლიძემ.
ამასთან, დეპუტატმა საქართველოში საფრანგეთის პრეზიდენტის, ფრანსუა ოლანდის გუშინდელი ვიზიტის ფარგლებში გაფორმებულ ხელშეკრულებებზეც ისაუბრა და განმარტა, რომ აღნიშნული სერიოზულ ფუნდამენტს წარმოადგენს საქართველოში ევროპული ბიზნესის შემოსასვლელად.
"იცით, რომ ხელი მოეწერა კონკრეტულ პროექტებს. თითოეული მათგანის განხორციელება ძალიან მნიშვნელოვანია, ეს იქნება ინფრასტრუქტურის სფერო, სატრანსპორტო სფერო, ტურიზმი თუ ნებისმიერი სხვა. ეს არის სერიოზული ფუნდამენტი, რომ რეალური ევროპული ბიზნესი შემოვიდეს საქართველოში" - აღნიშნა დეპუტატმა.