საპარლამენტო უმცირესობის წევრის, გივი თარგამაძის განცხადებით, დღევანდელი ხელისუფლება თავისი პოლიტიკით სახელმწიფო უსაფრთხოების ფუნდამენტურ საფუძვლებს სერიოზულ ზიანს აყენებს.
გივი თარგმაძემ დღევანდელ ბრიფინგზე იმ პირებზე ისაუბრა, რომელიც, მისი აზრით, რუსეთის სასარგებლოდ ჯაშუშობაში იყვნენ მსჯავრდებულები და ხელისუფლებს მიერ პოლიტპატიმრის სტატუსით გათავისუფლდნენ.
მისი განცხადებით, დღევანდელმა მთავრობამ საქართველოს წინააღმდეგ იარაღით გამოსული, ამბოხებული პირები გმირებად შერაცხა და დაწყებულია კოდორის ხეობაში ჩატარებული სპეცოპერაციის მონაწილე სამხედრო პირების დაკითხვებიც.
"ოთანაძე და რუსეთის ინტერესების გამტარებელი პირები ძალ-ღონეს არ იშურებენ ემზარ კვიციანისთვის იგივე სტატუსის მისანიჭებლად და ციხიდან გამოსაშვებად. ემზარ კვიციანი, რომელიც ასევე იარაღით ხელში გამოვიდა საკუთარი სამშობლოს წინააღმდეგ მთელი ამ ხნის განმავლობაში, მათ შორის 2008 წლის რუსეთის აგრესიის დროს, იმყოფებოდა რუსეთის ფედერაციის ტერიტორიაზე, რუსეთის მფარველობის ქვეშ. მას საპარლამენტო უმრავლესობის 35 წევრი დაუდგა თავდებში. მათი უმრავლესობა სწორედ ანტიდასავლურად განწყობილ ბირთვს მიეკუთვნება, რომელსაც პარლამენტის ამჟამინდელი ფაქტობრივი თავმჯდომარე და კომპარტიის ცეკა-ს ყოფილი ინსტრუქტორი გიორგი ვოლსკი უდგას სათავეში", განაცხადა გივი თარგამაძემ.
მისივე თქმით, 15 ივნისის ადგლობრივი თვითმმართველობის არჩევნებზე "ქართულმა ოცნებამ" თბილისი ერთერთ უბანში კანდიდატად წამოაყენა მუხროვანის ამბოხის მონაწილე, ოდიოზური ფიგურა კობა კობალაძე, რომელიც ღიად აკრიტიკებს ამჟამინდელ თავდაცვის მინისტრს დაგვიანებული, მაგრამ სწორი ინიციატივის გამო, განლაგდეს ნატო-ს საჰაერო თავდაცვის სისტემები საქართველოში.