საქართველოს ვიცე-პრემიერმა, ეკონომიკისა და მდგრადი განვითარების მინისტრმა გიორგი კვირიკაშვილმა საქართველოს ბიზნეს ასოციაციის სამეურვეო საბჭოს წევრებთან საქმიანი სადილი გამართა. მას ასევე დაესწრნენ ეკონომიკისა და მდგრადი განვითარების მინისტრის პირველი მოადგილე დიმიტრი ქუმსიშვილი, მინისტრის მოადგილე ქეთევან ბოჭორიშვილი და ბიზნეს ომბუდსმენი გიორგი გახარია.
შეხვედრაზე საუბარი წარიმართა საქართველოს მთავრობის ეკონომიკურ რეფორმებზე, ასევე მიმდინარე და სამომავლო პროექტებზე, მათ შორის, წარმოების, ინფრასტრუქტურის, ტურიზმის, აგროსექტორის და ენერგეტიკის კუთხით.
ვიცე-პრემიერმა, ეკონომიკისა და მდგრადი განვითარების მინისტრმა გიორგი კვირიკაშვილმა დამსწრე საზოგადოებას გააცნო მეწარმეობის მხარდამჭერი სამთავრობო პროექტები, რომლებმაც ქვეყნის ეკონომიკის განვითარებასა და ბიზნესის სტიმულირების საქმეში მნიშვნელოვანი როლი უნდა ითამაშონ. გარდა ამისა, ყურადღება გამახვილდა მთავრობის სამოქმედო პროგრამებზე, რომლებიც მიმართულია ქვეყნის მთავარ სავაჭრო პარტნიორებთან სავაჭრო-ეკონომიკური და საინვესტიციო ურთიერთობების გაღრმავებისკენ. ვიცე-პრემიერმა ასევე გაამახვილა ყურადღება საქართველოში საფონდო ბაზრის განვითარებასა და საპენსიო სისტემის რეფორმის შესახებ.
შეხვედრის მონაწილე მსხვილი ბიზნესის წარმომადგენლებმა წამოწიეს ის საკითხები, რომლებიც საქმიანი წრეებისთვის მნიშვნელოვანია.
დასასრულს, ვიცე-პრემიერმა, ეკონომიკისა და მდგრადი განვითარების მინისტრმა გიორგი კვირიკაშვილმა აღნიშნა, რომ საქართველოს მთავრობის დიალოგი ბიზნესთან გაგრძელდება და მსგავს კონსულტაციებს სისტემატური ხასიათი ექნება.
