საქმე ეხება, 2011 წლის 5 ივნისს, „აგვისტოს 5 დღის" პრემიერის შემდეგ გამართულ საქველმოქმედო ვახშამს, რომელსაც ჰოლივუდის ვარსკვლავები: შერონ სტოუნი, ენდი გარსია და რენე ჰარლინი ესწრებოდნენ.
საქველმოქმედო ვახშმის ოფიციალურ მასპინძლად ,,საქართველოს ბიზნესასოციაცია" დასახელდა.

საღამოს გენერალური სპონსორი - ,,საქართველოს ბანკი," პლატინის სპონსორი -,,რუსთავის აზოტი", ოქროს სპონსორი - ,,მადნეული" და ,,კვარციტი", ხოლო ვერცხლის სპონსორი - ,,სილქროუდ ჯგუფი" იყვნენ. წვეულება რუსთაველის თეატრში გვიანობამდე გაგრძელდა და მას პოლიტიკოსებთან ერთად, ბიზნესმენებიც ესწრებოდნენ, ვახშამი 160 სტუმარზე იყო გათვლილი.

საქართველოს ბიზნეს-ასოციაციის პრეზიდენტის განცხადებით, რუსთაველის თეატრში გამართულ საქველმოქმედო ვახშამზე შეგროვებული 1.5 მილიონი ლარიდან, 1 მილიონი ლარი 2008 წლის აგვისტოს ომში დაღუპულთა ოჯახებზე გადანაწილდებოდა.

ასოციაციამ სხვადასხვა სახელმწიფო უწყებასთან: თავდაცვის, შინაგან საქმეთა, სამინისტროსთან, ლტოლვილთა და განსახლების სასჯელაღსრულების, პრობაციისა და იურიდიულ საკითხთა სამინისტროებთან მჭიდრო თანამშრომლობით, რამდენიმე თვის განმავლობაში, 2008 წლის აგვისტოს ომში დაღუპულთა ოჯახების წარმომადგენელთა სრული სია შეადგინა. სიაში, სულ 400-მდე ოჯახი აღმოჩნდა, რომელთაგან თითოეული, ერთჯერადად, 2500 ლარს მიიღებდა, ასევე მიმდინარეობდა კიდევ რამდენიმე ოჯახის დაზუსტება. ასოციაციის პრეზიდენტის განცხადებით, 1.5 მილიონი ლარიდან დარჩენილ თანხას, 500 ათას ლარს, ასოციაცია 2011 წლის ბოლოს დაგეგმილ მორიგ საქველმოქმედო ღინისძიებაზე გამოიყენებდა, რომელიც კვლავ აგვისტოს ომში დაღუპულთა ოჯახების დახმარებას მოემსახურებოდა. კითხვაზე: ,,უკვე მიიღეს თუ არა დაღუპულთა ოჯახებმა დახმარებები", საქართველოს ბიზნესასოციაციის პრეზიდენტმა ჟურნალისტებს განუცხადა, რომ პროცესი დასრულების ეტაპზე იყო და თანხების გაცემა 2011 წლის აგვისტოში მოხდებოდა.

როგორც ,,ახალგაზრდა ადვოკატებში" აცხადებენ, საკითხის შესწავლის შემდეგ აღნიშნული თანხების ადრესატებად დასახელებული პირებისგან მიიღეს პასუხი, რომ ფილმის პრემიერის შედეგად გამართული საქველმოქმედო საღამოდან შემოსული, ხოლო შემდეგ საჯაროდ დაპირებული თანხა არ მიუღიათ.


,,ახალგაზრდა ადვოკატებმა" წერილობით მიმართა საქართველოს ლტოლვილთა და განსახლების და თავდაცვის სამინისტროებს და საქველმოქმედო ვახშამის შედეგად შემოსული თანხით, ადგილნაცვალი პირების დახმარების ფაქტის შესახებ ინფორმაცია მოითხოვა. ორივე სამინისტროში განაცხადეს, რომ აღნიშნულ საკითხთან დაკავშირებით, რაიმე სახის ინფორმაცია არ გააჩნიათ.

ამ თანხების შესახებ ინფორმაცია ვერც შინაგან საქმეთა სამინისტროსა და ჯანმრთელობისა და სოციალური დაცვის სამინისტროში მოიძიეს.
ორგანიზაციის განცხადებით, გაჩნდა საფუძვლიანი ვარაუდი, რომ ,,აგვისტოს 5 დღის" პრემიერის შემდგომ საქველმოქმედო ვახშამი, ,,საქართველოს ბიზნეს ასოციაციის" ინიციატივის ნაცვლად, ხელისუფლების ღონისძიება გახლდათ, საიდანაც შემოსული თანხა, ადგილნაცვალი პირების დახმარების მაგივრად, საღამოს საორგანიზაციო საკითხებს, მთლიანობაში კი ყოფილი მმართველი პარტიის ინტერესებს მოხმარდა.