დღეს საქართველოს პარლამენტში ევროპის დღეს აღნიშნავენ. ღონისძიებას პოლიტიკოსები, სამოქალაქო საზოგადოებისა და საერთაშორისო ორგანიზაციების წარმომადგენლები და ახალგაზრდები დაესწრებიან.
ღონისძიებას გახსნიან პარლამენტის თავმჯდომარე დავით უსუფაშვილი, საქართველოში ევროკავშირის წარმომადგენლობის ხელმძღვანელი ფილიპ დიმიტროვი და გაეროს განვითარების პროგრამის მუდმივი წარმომადგენელი ნილს სკოტი.
პარლამენტის თავმჯდომარე ახალგაზრდული კონკურსის "ჩემი წერილი ევროპას" თოთხმეტ გამარჯვებულს დააჯილდოვებს. ის ასევე წარადგენს საინფორმაციო ვიდეო რგოლებს, რომლებიც შეიცავს განმარტებებს საქართველო-ევროკავშირს შორის ასოცირების შესახებ შეთანხმების მთავარი სფეროების შესახებ. ქართულ, აფხაზურ, ოსურ, სომხურ და აზერბაიჯანულ ენებზე შექმნილი ვიდეო რგოლები პარლამენტის ვებ-გვერდსა და ფეისბუქზე განთავსდება, ასევე გადაიცემა საზოგადოებრივი მაუწყებლისა და რეგიონული ტელევიზიების ეთერით.
ევროპის დღის აღნიშვნის ორგანიზატორია საქართველოს პარლამენტი ევროკავშირისა და გაეროს განვითარების პროგრამის ხელშეწყობით.
ღონისძიება 14:00 საათზე, რუსთაველის გამზირზე, მდებარე პარლამენტის შენობის შოთა რუსთაველის სახელობის დარბაზში აღინიშნება.
