7 მაისს სასტუმრო „შერატონ მეტეხი პალასში" გაიმართა სემინარი „ეროვნული სივრცითი მონაცემების ინფრასტრუქტურის (NSDI) შექმნის სამოქმედო გეგმა ციფრული საქართველოსთვის".
სემინარს ესწრებოდნენ იუსტიციის მინისტრის მოადგილე მიხეილ სარჯველაძე, საჯარო რეესტრის ეროვნული სააგენტოს თავმჯდომარე პაპუნა უგრეხელიძე, თავდაცვის, რეგიონული განვითარებისა და ინფრასტრუქტურის, სოფლის მეურნეობის, გარემოსა და ბუნებრივი რესურსების, ეკონომიკისა და მდგრადი განვითარების, ენერგეტიკის სამინისტროებისა და დარგობრივი უწყებების წარმომადგენლები.
სემინარზე ქვეყანაში ეროვნული სივრცითი ინფრასტრუქტურის შექმნასთან დაკავშირებული არსებული მდგომარეობა და პროექტის სამოქმედო გეგმა განიხილეს, რომელიც ავსტრიელი ექსპერტების დახმარებით შემუშავდა. ასევე წარმოდგენილი იყო გეოპორტალის სადემონსტრაციო ვერსია, რომლის საშუალებით სახელმწიფო და კერძო სექტორი გეოსივრცით მონაცემებს მიიღებს.
მონაცემების ერთიანი ინფრასტრუქტურის შექმნის მიზანია გარემოსდაცვითი საკითხების მართვის რეგულირება, კატასტროფების თავიდან აცილება, სოფლის მეურნეობის, თავდაცვის, ინფრასტრუქტურული პროექტების, საგანგებო სიტუაციების, საკომუნიკაციო და აერონავიგაციის სისტემების მართვა და ეფექტური ფუნქციონირება.
სემინარი ჩატარდა მონაცემთა გაცვლის სააგენტოს ევროკავშირის დაძმობილების (twinning) პროექტის - „ელექტრონული მმართველობის განვითარება საქართველოში" ფარგლებში.
გეოგრაფიული სივრცითი ინფორმაციის ინფრასტრუქტურის ჩამოყალიბება ევროკავშირის მოთხოვნაა, რომელსაც ის წევრ ქვეყნებს უყენებს. დირექტივა ამ სფეროს საკანონმდებლო ბაზისა და ადმინისტრაციული საკითხების შესაბამისობაში მოყვანას ითვალისწინებს. მიუხედავად იმისა, რომ საქართველო არ არის ევროკავშირის წევრი, მთავრობის დადგენილებით, ეროვნული სივრცითი მონაცემების ინფრასტრუქტურის შექმნასთან დაკავშირებით დაკომპლექტდა სამთავრობო კომისია, იუსტიციის სამინისტროს საჯარო რეესტრის ეროვნულ სააგენტოს კი დაევალა ქვეყნისთვის ეროვნული სივრცითი მონაცემების ინფრასტრუქტურის შექმნის საქმიანობის კოორდინაცია.
საქართველო პირველი ქვეყანაა კავკასიის რეგიონში, რომელმაც ევროპულ სტანდარტებთან თავსებადი ეროვნული სივრცითი მონაცემების ინფრასტრუქტურის შექმნაზე მუშაობა დაიწყო, რაც ქვეყნის ევროკავშირთან ინტეგრაციის პროცესისკენ გადადგმული კიდევ ერთი ნაბიჯია.