არასამთავრობო ორგანიზაცია „ადამიანი, კანონი, თავისუფლება" დაინტერესდა ქალაქ თბილისის ქუჩებში დამონტაჟებული აზარტული და მომგებიანი თამაშობების აპარატებით. აღნიშნულ აპარატებში გასათამაშებლად წარმოდგენილია სხვადასხვა ნივთები: მობილური ტელეფონები, საათები, ყურსასმენები და სხვა მცირედი ტექნიკა. აგრეთვე გასათამაშებელ საგანს წარმოადგენს თამბაქო, რომლის რეალიზებაზე სახელმწიფოს მხრიდან დადგენილია შესაბამისი შეზღუდვა.
როგორც ორგანიზაციის მიერ განხორციელებულმა დაკვირვების შედეგმა ცხადყო, აღნიშნული სათამაშო აპარატებით ხშირად სარგებლობენ არასრულწლოვნები, რაც ზიანს აყენებს როგორც მათ ფსიქიკურ და ზნეობრივ განვითარებას, აგრეთვე ჯანმრთელობის მდგომარეობას, იმ გარემოებიდან გამომდინარე რომ სათამაშო აპარატებით, რომლებზეც არ ხორციელდება კონტროლი, არასრულწლოვნებს საშუალება ეძლევათ დაეუფლნონ თამბაქოს, რომელზეც შეზღუდვა არასრულწლოვანთათვის კანონითაა რეგულირებული. ორგანიზაციას მიაჩნია რომ აზარტული და მომგებიანი თამაშობების აპარატთა მფლობელები არღვევენ საქართველოს კანონმდებლობას, კერძოდ ადმინისტრაციული სამართალდარღვევათა კოდექსის 155-ე მესამე პრიმა მუხლით გათვალისწინებულ მე-4 და მე-2 ნაწილით დადგენილ მოთხოვნებს. აგრეთვე ამავე კოდექსის 176-ე პირველი პრიმა მუხლით გათვალისწინებულ აკრძალვას.
ზემოთაღნიშნული პრობლემიდან გამომდინარე ორგანიზაციამ წერილით მიმართა საქართველოს ფინანსთა მინისტრს ბ-ნ ნოდარ ხადურს შესაბამისი ღონისძიებების გასატარებლად, რათა კონტროლი დაწესდეს, როგორც ე.წ. აზარტული და მომგებიანი თამაშობების აპარატებზე, აგრეთვე შესაბამის ნებართვის გამცემ უწყებაზე.
