უწყებათაშორისი კომისია თბილისის მერიის მისამართით რეკომენდაციას ამზადებს, რომელიც მერიის მხრიდან ადმინისტრაციული რესურსის გამოყენების საკითხს ეხება.
წულუკიანის განმარტებით, დღევანდელი კომისიის სხდომაზე დასახელდა რამდენიმე მაგალითი, როცა თბილისის მერიის სხვადასხვა წარმომადგენელი მიდის მოქალაქესთან ქმნის პრობლემას, მათ შორის, უკანონო მშენებლობების და სხვა მიმართულებით, შემდგომში კი იგივე მერიის სხვა წარმომადგენელი მიდის იმავე მოქალაქესთან და აღნიშნულ პრობლემას აგვარებს.
მისივე თქმით, კომისია აღნიშნულ საკითხს სწავლობს და ამ თემით სამართალდამცავი ორგანოები უნდა დაინტერესდნენ.
"როგორც კომისიის მონაწილე არასამთავრობო სექტორი გვეუბნება, მერია აქტიურად უნდა იყენებდეს ადმინისტრაციულ რესურსს. ჩვენ ამ შემთხვევებს ვსწავლობთ და თბილისის მერიას მივმართავთ რეკომედაციით, რომ თუ ცენტრალური ხელისუფლება პოლიტიკურ პროცესებს სახელმწიფოსგან მიჯნავს, კეთილი ინებოს მერიამ და ისიც ანალოგიურად მოიქცეს", - განუცხადა ჟურნალისტებს თეა წულუკიანმა.
