საგარეო საქმეთა მინისტრის მოადგილის დავით ჯალაღანიას განცხადებით, ახალგორში ე.წ. საზღვარი დღეს, ან ხვალ გაიხსნება და აღნიშნულთან დაკავშირებით, საგარეო უწყება შინაგან საქმეთა სამინისტროსთან მჭირდო ოპერატიულ კავშირში იმყოფება.
მისივე თქმით, ოკუპირებულ ტერიტორიებზე ადამიანის უფლებების დარღვევის ფაქტებზე, ვენაში ვიზიტად მყოფი საგარეო საქმეთა მინისტრი მაია ფანჯიკიძე სიტყვით გამოსვლისას ისაუბრებს.
„სამწუხაროდ, ე.წ. საზღვარი ჯერ გახსნილი არ არის. მხოლოდ ჰუმანიტარული აქციებისთვის არის იგი ღია, თუკი რაიმე საჭიროება არის მოქალაქეებისთვის. ალბათ, დღეს ან ხვალ მოხდება მისი გახსნა. ყოველ შემთხვევაში, ამის ინდიკაცია მოსახლეობის მხრიდან არის. რა თქმა უნდა, ძალაშია მინისტრის განცხადება იმის შესახებ, რომ თუ ეს საკითხი ადგილობრივ დონეზე ვერ გადაწყდა და საოკუპაციო რეჟიმმა არ გახსნა ე.წ. საზღვარი, საგარეო უწყება საერთაშორისო ბერკეტებს აამოქმედებს ამ მიზნის მისაღწევად", - განაცხადა დავით ჯალაღანიამ.
