დღეს, 5 მაისს, სახელმწიფო საკონსტიტუციო კომისიის ფარგლებში ორი სამუშაო ჯგუფის სხდომა გაიმართება. 11:00 საათზე, იუსტიციის სახლის საკონფერენციო დარბაზში, საქართველოს პარლამენტის, პრეზიდენტისა და მთავრობის საკითხთა სამუშაო ჯგუფი შეიკრიბება. განიხილება მთავრობის ნდობა-უნდობლობის დღეს მოქმედი პროცედურები და კომისიის წევრების შენიშვნები ნდობა-უნდობლობის მექანიზმზე. ასევე პარლამენტის საბიუჯეტო უფლებამოსილების გაფართოების საკითხი.
სამუშაო ჯგუფის ხელმძღვანელია ვახტანგ ხმალაძე. ჯგუფი 31 წევრის შემადგენლობით მუშაობს და მასში დეპუტატები, ექსპერტები და არასაპარლამენტო ოპოზიციის წარმომადგენლები შედიან.
დღესვე, 17:00 საათზე, იუსტიციის სახლში დაგეგმილია დამოუკიდებელი კონსტიტუციური ინსტიტუტების საკითხთა სამუშაო ჯგუფის სხდომა. განიხილება უშიშროების საბჭოს კონსტიტუციურ სტატუსთან დაკავშირებით წარმოდგენილი მოსაზრებები, ასევე, სახელმწიფო აუდიტთან დაკავშირებული საკითხები.
სამუშაო ჯგუფს ლევან ბეჟაშვილი ხელმძღვანელობს. ჯგუფი 11 წევრის შემადგენლობით მუშაობს. მათ შორის არიან დეპუტატები, სახალხო დამცველი, ექსპერტები.