ფარულ საგამოძიებო მოქმედებებთან დაკავშირებით, პარლამენტის იურიდიულ საკითხთა კომიტეტში შემუშავებული საკანონმდებლო ცვლილებათა პაკეტი უწყებათაშორისმა სამუშაო ჯგუფმა შეისწავლა და შენიშვნები და წინადადებები კომიტეტს მიაწოდა.
პრინციპული საკითხების უდიდესი ნაწილი ამ ეტაპზე შეთანხმებულია. ამის შესახებ ნათქვამია სახელმწიფო უსაფრთხოებისა და კრიზისების მართვის საბჭოს განცხადებაში, სადაც პრემიერის დავალებით, უწყებათაშორისი სამუშაო ჯგუფი შეიქმნა.
"უწყებათაშორისი ჯგუფის მიერ განხორციელდა საკანონმდებლო ინიციატივის ყოველმხრივი ექსპერტიზა, განსაკუთრებული ყურადღება დაეთმო სახელმწიფო უსაფრთხოების რისკების ანალიზს, ასევე უცხოელი ექსპერტების დასკვნების და აღნიშნული სფეროს რეგულირების პრაქტიკის შესწავლას მსოფლიოს სხვადასხვა ქვეყნაში.
სამუშაო ჯგუფის მუშაობის პარალელურად, სახელმწიფო უსართხოებისა და კრიზისების საბჭოს აპარატის თანამშრომლები ჩართული იყვნენ ზემოხსენებული საკანონმდებლო ინიციატივის ფართო საზოგადოებრივ განხილვებში, ამავე დროს მიმდინარეობდა აქტიური კონსულტაციები პარლამენტის იურიდიულ კომიტეტთან, ორგანიზებული იყო მოსაზრებების გაცვლა და კანონპროექტთა პაკეტის დეტალური დისკუსიები",- ნათქვამია განცხადებაში.
