საპარლამენტო უმრავლესობის გადაწყვეტილებით, "დისკრიმინაციის ყველა ფორმის აღმოფხვრის შესახებ" კანონპროექტს "საზოგადოებრივი ზნეობის დაცვის" პუნქტი ემატება, რაც გულისხმობს ამ მიმართულებით პროექტის მეორე მუხლის მეორე პუნქტის კორექტირებას.
კანონპროექტის ეს ნაწილი ამბობს, რომ საქართველოში აკრძალულია ნებისმიერი სახის დისკრიმინაცია. პირდაპირ დისკრიმინაციად კი მიჩნეულია ისეთი მოპყრობა ან პირობების შექმნა, რომელიც საქართველოს კანონმდებლობით გათვალისწინებული უფლებებით სარგებლობისას, რომელიმე ნიშნის გამო, პირს არახელსაყრელ მდგომარეობაში აყენებს ანალოგიურ პირობებში მყოფ სხვა პირებთან შედარებით, გარდა ისეთი შემთხვევისა, როდესაც ამგვარი მოპყრობა ემსახურება ლეგიტიმულ მიზანს და აუცილებელია დემოკრატიულ საზოგადოებაში, ხოლო გამოყენებული საშუალებები თანაზომიერია ასეთი მიზნის მისაღწევად.
აღნიშნული მუხლის ბოლო ნაწილში ხდება ჩამატება ფრაზის - "საზოგადოებრივი ზნეობის დაცვა, როცა ქმედებას გააჩნია გონივრული და ობიექტური გამართლება".
აღნიშნულ ცვლილებასთან დაკავშირებით, პარლამენტის პლენარულ სხდომაზე მთავრობის საპარლამენტო მდივანმა შალვა თადუმაძემ განმარტა, რომ აღნიშნულ ცნებას "ადმინისტრაციულ სამართალდარღვევათა კოდექსი" იცნობს და საზოგადოებრივი ზნეობის დარვევის ქმედება ადმინისტრაციულ სახდელს ექვემდებარება.
"ამით არანაირად არ ხდება ახალი ცნების შემოღება", - აღნიშნა თადუმაძემ.
პარლამენტმა კანონპროექტი მეორე მოსმენისას 112 ხმით მიიღო.
